[᭑᭔ 14B]
᭑᭔
ᬳᬸᬫᬄᬢ᭄ᬮᬰᭂᬭᬸᬕ᭄᭞ᬭᬶᬂᬲᬶᬩ᭄ᬢᬦ᭄᭞ᬫᬩ᭄ᬬᬬᬕᬦ᭄ᬯᬦ᭄ᬢᭂᬦ᭄ᬋᬩᬄ᭚ᬧᬜᭂᬗ᭄ᬓᭂᬃᬢᬾᬫ᭄ᬩᭀᬓᬾᬲᬫᬶ᭞ᬓᭀᬭᬶᬳᬕᬸᬂᬫᬶᬯᬄᬲᬗ᭄ᬕᬃ᭞ᬳᬓᬾᬄᬋᬩᬄᬢᬦ᭄ᬧᬕᬦ᭄ᬢᬸᬮ᭄᭞ᬕ᭄ᬤᭀᬂᬢᬢᬸᬭᬳᬜ᭄ᬚᬯ᭄ᬯᬵ᭞ᬢ᭄ᬮᬲᬫᬶᬧᬚᬸᬗ᭄ᬓᬶ
ᬮᬶᬂ᭞ᬯ᭄ᬧ᭄ᬢᭂᬦ᭄ᬓᬦ᭄ᬢᭀᬲ᭄ᬳᬶᬧᬸᬦ᭄ᬮᬫ᭄ᬧᬸᬲ᭄᭞ᬓᬋᬩᬳᬦ᭄᭞ᬢ᭄ᬧᬾᬦ᭄ᬕᭂᬤᭀᬗᬾᬤᬶᬩᬜ᭄ᬚᬃ᭚ᬤᬾᬦᬶᬂᬕ᭄ᬦᬄᬚᬦ᭄ᬫᬵᬗᬸᬗ᭄ᬲᬷ᭞ᬲᬾᬧᬦᬦ᭄ᬧᭀᬮᬶᬄᬫᬮᬾᬗ᭄ᬓᬲ᭄᭞ᬕ᭄ᬮᬶᬲᬦ᭄ᬕᭂᬚᭀᬭᬾᬭᬯᬸᬄ᭞ᬳᬓᬾᬄᬲᬦᬾᬓᬩ᭠
ᬜ᭄ᬘᬦ᭄᭞ᬢ᭄ᬧᬾᬦ᭄ᬢᬾᬫ᭄ᬩᭀᬦ᭄ᬧᬚᬗ᭄ᬓᬶᬮᬶᬂ᭞ᬳᬯᬦᬦ᭄ᬩᬢᬄᬫᬳᬢᬸ᭞ᬓᬦ᭄ᬢᭀᬲ᭄ᬧ᭄ᬚᬄ᭞ᬲᬾᬧᬦᬦ᭄ᬫᬮ᭠ᬳᬶᬩᬸᬤᬮ᭄᭚ᬫᬮᬶᬄᬲ᭄ᬥᭂᬓᬦ᭄ᬫᬳᬘᬶ᭞ᬗᬢᬹᬭᬂᬧᬫᬶᬮᬬᬸᬯᬦ᭄᭞ᬗᬺᬱ᭄ᬳᬶᬕᬡ᭄ᬦᬵᬤᬸᬓ᭄ᬧᬸᬦᬶᬓᬸ᭞ᬮᬮᬶᬄ
ᬫᬸᬧᬸᬢᬂᬧᬫᭂᬡ᭄ᬟᬓ᭄᭞ᬮᬦ᭄ᬢᬭᬦ᭄ᬧᬓᬼᬫᬮᬶᬄ᭞ᬤᬾᬦᬶᬂᬲᬫ᭄ᬧᬸᬦ᭄ᬳᬶᬗᬦ᭄ᬢᬸᬢᬸᬕ᭄᭞ᬦᬾᬧᬶᬂᬢᬶᬕᬵ᭞᭠ᬤᬕᬶᬂᬧᬗᬃᬱᬵᬦ᭄ᬪᬝᬭᬵ᭚ᬓᬮᬶᬄᬧᬘᬂᬫᬗ᭄ᬯᭂᬯᭂᬳᬶᬦ᭄᭞ᬗᬢᬹᬭᬂᬧᬗᬺᬱ᭄ᬳᬶᬕᬡ᭄ᬦᬦ᭄᭞ᬤᬾᬦᬶᬂᬧᬸᬭᬵᬲ
[᭑᭕ 15A]
ᬫᬶᬳ᭄ᬭᬸᬕ᭄᭞ᬫᬗ᭄ᬤᬵᬲᬫ᭄ᬧᬸᬦ᭄ᬓᬮᬾᬫ᭄ᬧᬲᬦ᭄᭞ᬗᬢᬹᬭᬂᬧᬫᬬᬸᬕ᭄ᬮᬶᬲ᭄᭞ᬫᬦᬹᬭᬸᬢᬂᬲᬲ᭄ᬢ᭄ᬭᬵᬢᬸᬢᬹᬃ᭞᭠ᬓᬯᬾᬦ᭄ᬢᭂᬦᬦ᭄᭞ᬧᬶᬤᬩ᭄ᬥᬩ᭄ᬳᬦ᭄ᬤᬦᬶᬂᬚᬕᬢ᭄᭚ᬲᬧᬸᬦᬶᬓᬵᬓᬧᬶᬦᭂᬳᬶᬦ᭄᭞ᬳᬦ᭄ᬢᬓ᭄ᬲᬸᬮᬶᬗ᭄ᬕᬶᬳᬾᬲ
ᬫ᭄ᬬᬦ᭄᭞ᬤᬾᬦᬶᬂᬦᬸᬚᬸᬤᬶᬦᬵᬦ᭄ᬳᬶᬧᬸᬦ᭄᭞ᬢᬶᬍᬫ᭄ᬳ᭄ᬬᬾᬱ᭄ᬝᬵᬫᬦ᭄ᬫᭀᬦᬂ᭞ᬇᬰᬓᬵᬦ᭄ᬜᬲ᭄ᬬᬩᬗ᭄ᬲᬶᬢ᭄᭞ᬳᬸᬮᬸᬂᬤᬰᬵᬮᬶᬫ᭄ᬫᬵᬲᬫ᭄ᬧᬸᬦ᭄᭞ᬤᬸᬓ᭄ᬫᬸᬧᬸᬢᬂ᭞ᬗᬢᬹᬭᬂᬧᬓᬼᬫ᭄ᬭᬶᬂᬮ᭄ᬯᬄ᭚ᬲᬳᬵᬤᬶᬦᬵᬦ᭄ᬕᭂᬚᭀᬚᬢᬷ᭞ᬲ᭄ᬥᬸ᭠
ᬓ᭄ᬧᬸᬦᬶᬓᬵᬦᬤᬓᬂ᭞ᬳᬯᬦᬦ᭄ᬲᬺᬦ᭄ᬢᬬᬦ᭄ᬢᭂᬤᬸᬦ᭄᭞ᬓ᭄ᬭᬫᬵᬤᬾᬰᬦᬾᬓᬧᬸᬭᬵ᭞ᬤᬾᬦᬶᬂᬓᬭᬶᬕ᭄ᬮᬸᬲᬫᬶ᭞ᬳᬸᬫᬄᬜᬦᬾᬢ᭄ᬮᬲ᭄ᬳᬸᬯᬸᬕ᭄᭞ᬗ᭄ᬳᬶᬂᬢᬦ᭄ᬯᬦ᭄ᬤ᭄ᬬᬵ᭞ᬓᬾᬯᬮᬵᬮᬶᬗ᭄ᬲᬶᬭᬦ᭄ᬳᬸᬲᬦ᭄᭚ᬗ᭄ᬭᬭᬶᬲ᭄᭚ᬗ᭄ᬭᬭᬶᬲ᭄ᬫᬗᬢᬹ
ᬭᬂᬲᬚᬶ᭞ᬧᬗᭂᬦ᭄ᬢᭂᬕᬦ᭄ᬓᬭᬳᬬ᭄ᬯᬦ᭄᭞ᬗᬸᬮᬧ᭄ᬳᬫ᭄ᬩᬾᬓᬭᬳᬬ᭄ᬯᬦ᭄᭞ᬫᬶᬯᬄᬲᬬᬸᬢ᭄ᬤᬶᬃᬖ᭄ᬕᬵᬬᬸᬰ᭞ᬧᬕᭂᬃᬯ᭄ᬲᬶᬦᬾᬢᬦ᭄ᬫᬭᬷ᭞ᬫᬦᬸᬳᬸᬃᬧ᭄ᬭᬡ᭄ᬟᬧᬧᬶᬢᬸ᭞ᬦᬾᬫᬸᬢᬸᬲᬂ᭞ᬗᬱ᭄ᬝᬵᬯᬲᬚᬶᬧ᭄ᬧᬸᬦᬶᬓᬵ᭚ᬤᬸᬭᬸᬲ᭄ᬲᬋᬂ
Kaca:Bali-lontar-gaguritan-gunung-agung-meletus-04-300ppi.pdf/15
Kaca puniki sampun kauji-wacén
