Kaca:Bali-lontar-gaguritan-katak-300ppi.pdf/10

Kaca puniki sampun kauji-wacén

[᭙ 9B]
᭙
ᬗᭂᬗ᭄ᬓᬳᬶᬦ᭄ᬩᬸᬦ᭄ᬩᬸᬦᬦ᭄ᬓᬸᬧᬶᬂ᭞ᬮᬯᬸᬢ᭄ᬭᬶᬂᬘᬸᬗᬸᬄᬓᬳᬾᬫ᭄ᬧᭀᬲ᭄᭞ᬫᬤᬸᬮᬸᬭᬦ᭄ᬚᬧᬲᬶᬤ᭄ᬥᬶ᭞ᬳᬶ᭠ᬓᬢᬓ᭄ᬤᬤᬶᬫᬾᬮᬶᬂ᭞ᬫᬗᭂᬤᬢ᭄ᬲᬫ᭄ᬩᬶᬮ᭄ᬗᬭᬸᬄᬕᬸᬄ᭞ᬫᬫᬸᬜᬶᬫᭂᬕᬢ᭄ᬫᭂᬕᬢ᭄᭞ᬫᬢᬓᭀ
ᬦ᭄ᬦᬾᬜᬾᬦ᭄ᬲᬶᬄᬘᬳᬶ᭞ᬯᭂᬮᬲ᭄ᬢᬸᬳᬸ᭞ᬫᬧᬶᬲᬸᬓᬓᬳᬸᬭᬶᬧᬦ᭄᭟ᬦᬵᬗ᭄ᬳᬶᬂᬩᬧᬢ᭄ᬯᬭ᭠ᬍᬕ᭞ᬘᬳᬶᬗᭀᬮᬲᬶᬦ᭄ᬩᬵᬦ᭄ᬳᬸᬭᬶᬧ᭄᭞ᬤᬾᬦᬶᬂᬩᬧᬲᬸᬓᬧᭂᬚᬄ᭞ᬬᬤᬶᬦ᭄ᬳᬶᬤᬸᬧ᭄ᬢᬦ᭄ᬧᬤᬤᬶ᭞ᬓ᭠
ᬘᬘᬤ᭄ᬩᬳᬦ᭄ᬕᬸᬫᬶ᭞ᬚᭂᬗᬳᬾᬲᬢᬸᬗ᭄ᬕᬸᬦ᭄ᬢᬸᬯᬸᬄ᭞ᬍᬕᬬᬾᬦ᭄ᬮᬲ᭄ᬬᬧᭂᬚᬄ᭞ᬬᬾᬦ᭄ᬘᬳᬶᬢᬸᬫᬸᬮᬸᬲ᭄ᬳᬰᬶᬄ᭞ᬳᬾᬗ᭄ᬕᬮ᭄ᬲᬸᬤᬸᬓ᭄᭞ᬮᬸᬤᬶᬦ᭄ᬩᬧᬮᬲ᭄ᬬᬬᬂ᭟ᬳᬶᬓᬧ᭄ᬮᬾᬕᬦ᭄ᬯᭂᬮᬲ᭄ᬦᬶᬗᭂᬳᬂ᭞
ᬫᬲᬯᬸᬢ᭄ᬲᬫ᭄ᬩᬶᬮ᭄ᬫᬗᭂᬮᬶᬂ᭞ᬩᬧᬢᬶᬢ᭄ᬬᬂᬳᬓᬧ᭄ᬮᬾᬕᬦ᭄᭞ᬮᬾᬮᬶᬗᬂᬲᬵᬫ᭄ᬧᬸᬦᬂ᭠ᬮᬮᬶ᭞ᬢᬶᬢ᭄ᬬᬂᬦᬸᬦᬲ᭄ᬧᬯᬺᬢᬶ᭞ᬧᬸᬦᬧᬶᬲᬶᬄᬓᬦ᭄ᬥᬦ᭄ᬳᬶᬧᬸᬦ᭄᭞ᬤ᭄ᬯᬦᬶᬂᬓᬲᬶᬦᬗ᭄ᬓᬯᭀᬦ᭄᭠
[᭑᭐ 10A]
ᬦᬦ᭄᭞ᬩᬧᬫᬢᭂᬕᬸᬮ᭄ᬳᬶᬭᬶᬓᬶ᭞ᬤᭂᬓ᭄ᬤᭂᬓᬺᬜᬸᬄ᭞ᬢᬫ᭄ᬧᬓᬾᬓᬤᬶᬫᬬᬸᬤ᭄ᬥ᭟ᬳᬶᬓᬢᬓ᭄ᬓᭂᬦ᭄ᬤᭂᬮ᭄ᬤᬶᬫᬦᬄ᭞ᬭᬾᬄᬓᭂᬦᬩᬵᬦ᭄ᬜᬗᬶᬗᭂᬢᬶᬦ᭄᭞ᬫᬦ᭄ᬢᬸᬦ᭄ᬜᬦᬾᬳᬶᬓᬧ᭄ᬮᬾᬕᬦ᭄᭞ᬢᬦ᭄ᬤᬸᬬᬕ᭄ᬚᬕ᭄ᬗ
ᬦᬫ᭄ᬧᭂᬓᬶᬦ᭄᭞ᬗᭂᬮᬸᬢ᭄ᬩᬯᭀᬂᬫᬗᭂᬮᬶᬂ᭞ᬫᬫᬸᬜᬶᬗᭀᬮᬲᬂᬓᬬᬸᬦ᭄᭞ᬉᬥᬸᬄᬘᭂᬦᬶᬂᬧ᭄ᬬᬦᬓ᭄ᬩᬧ᭞ᬩᬸᬓᬧᬶᬢᬸᬤᬸᬳᬶᬂᬯᬶᬥᬶ᭞ᬩᬧᬳᬶᬤᬸᬧ᭄᭞ᬳᬶᬘᭂᬦᬶᬂᬦᭂᬧᬸᬓᬶᬦ᭄ᬳᬾᬭᬂ᭟ᬢᬸᬢᬸᬕ᭄ᬲᬚ᭠
ᬢᬦᬶᬩᬕ᭄ᬬ᭞ᬮᬘᬸᬃᬘᬳᬶᬦᬾᬦᬾᬚᬦᬶ᭞ᬫᬗᬗ᭄ᬕᭀᬦ᭄ᬩᬧᬭᬭᬵᬫ᭞ᬤᬤᬶᬓᬓᭂᬤᬾᬓᬦ᭄ᬕᬸᬫᬶ᭞ᬲᬗ᭄ᬓᬦᬶᬂᬩᬸᬓᬚᬦᬶ᭞ᬩᬧᬫᬦᭂᬧᬸᬓᬶᬦ᭄ᬮᬘᬸᬃ᭞ᬢ᭄ᬯᬭᬢᬳᬸᬭᬶᬂᬤᬾᬰ᭞ᬓᬢᬸᬚᬸᬩ
ᬧᬫᬮᬮᬶ᭞ᬗᬮᬶᬄᬘᬧᬸᬂ᭞ᬲᬫ᭄ᬩᬶᬮᬂᬫᬓᬓᬶᬤᬸᬗᬦ᭄᭟ᬤᬾᬦᬶᬂᬦᬾᬦᬾᬲᬸᬩᬲᬸᬩ᭞ᬫᬚᬮᬦ᭄ᬫᬮᬮᬶᬮᬮᬶ᭞ᬓᬤᭀᬂᬳᬗ᭄ᬕᭀᬦ᭄ᬩᬧᬘᬶᬳ᭄ᬦ᭞ᬧᬂᬤᬲᬭᬸᬢᭂᬓᬾᬦ᭄ᬫᬮᬶᬂ᭞ᬢ᭄ᬯᬭᬳᬤ