Raden Mantri, masih paselanganga". Ida Raden Mantri masih nyingak Ni Ketut Waluh, merang kone lantas kayunidane.
"Be dadi tusing dadi pesan ngelah ngedalem I Adi. Suba tusing baang mamesu masi mamesu, jabin jekjekin jaran tendasne." Keto kayun Ida Raden Mantri. Dadi pati kepug lantas Ni Ketut Waluh malaib, nganti keles waluhne ne mentik di duur idane.
Kacrita rauh suba ida di taman, nglantas ida ka pamereman ngubet lawangan, pangangge mas-masan idane ane di waluhe lantas pesuang ida. Ida Raden Mantri ngetut Ni Ketut Waluh ka taman. Sarauh idane di taman jag nomplok ka pamreman, dadi kapanggihin panganggen Ni Ketut Waluhe mabrarakan di pameremane. Mataken lantas Ida Raden Mantri,
"Adi, Adi ne dija Adi maan kene-kene?"
"Mula gelah tiang ja Beli." Keto pasaume Ni Ketut Waluh, lantas balihina panganggene, makejang kone mapainget mungguh Raden Galuh Daha.
"Bah ne kalingane misan gelahe, I Adi Galuh Daha tuara tawang". Keto kayunidane, lantas ida ngandika,
"Adi, Adi jani Beli ngorahin Adi apang Adi nawang, sujatinne Beli suba okan Ida Sang Prabu Koripan. Buat dewek Adine, Beli suba tau Adi Galuh Daha, tuara taen pesan Beli lakar sida matemu teken Adi, jalan Adi bareng ka puri ngaturang uninga teken Ida I Aji, mungpung AJin Adine dini. Sakewala enden malu buin akejep , Beli nu maputusan ka puri ngaturang indike ne". Keto pangandikan Ida Raden Mantri, Ida Raden Galuh sairing. Ida Raden Mantri pamuput ka puri, ngaturang indik idane mantuk sareng Raden Galuh Daha.
Gelising satua, lantas kapendak Ida Raden mantri kalih Ida Raden Galuh ban gong muah mamas. Di subanne ida sareng kalih rauh di puri, tan kacrita kenak pakayunan Ida Sang Prabu Koripan kalih Daha, nglantas Ida Raden Mantri muah Raden Galuh kapabuncingan, ento banten odalane tatab ida sareng kalih.
128
