lantas ida teken I Jrudeh,
"Paman Jrudeh, kadonga Paman tonden madaar, kema ja malu alihang nira yeh, to ajak timpale". Matur Jrudeh,
"Matur sisip Ratu Raden Mantri, dija men lakun titiang ngrereh toya, kenten nenten wenten tukad driki".
"Dija men orahin nira, tegarang kema laku nganginang, singa kaget nepukin yeh anakan apa to ditu. Mangde ja aget ada kubu tepukin, ditu ngidih yeh, yen sing baanga ngidih, meli kenken to patutne". Dening keto pangandikan Ida Raden Mantrine, majalan lantas I Jrudeh nganginang nengteng procot. Kanti suba joh pesan pajalanne masing tusing nepukin yeh. Budi malipetan tusing kone ia bani, takut menggahina tekan Ida Raden Mantri. Dadi nglantas kone ia majalan. Buin akajepne tingalina lantas ada kubu, kendel pesan kone kenehne, lantas ia kema. Kubune ento linggih Ida Raden Galuh. Suba jene paak teken kubun Ida Raden Galuhe lantas ia kongkonga teken cicinge. Dugase ento i panyeroan sedekan epot magarapan di paon. Ida Raden Galuh di ambenne kone ida malinggih sambilang ida masusuin okane. Mara i panyeroan ningeh cicinge ngongkong, matolihan lantas ia, nget ajinanga ada jelema teka nuju ka kubunne. Ngenggalang lantas ia ngaturin Ida Raden Galuh,
"Ratu Raden Galuh, gelisang Ratu ka pamereman, puniki wenten jatma rauh mriki". Ngelisang kone Ida Raden Galuh ka pamereman tur nguneb kori. Suba jene I Jrudeh teked diwangan pondoke, kauk-kauk lantas ia,
"Jero, Jero madue kubu". Masaut i penyeroan,
"Sira nika kauk-kauk diwangan."
"tiang nika".
"Tiang, tiang siara nika".
"Tiang I Jrudeh".
Jagjagina lantas teken i panyeroan,
"Napi nika rereh Jerone mriki".
"Tiang nawegang Jero luh; icen tiang nunas yeh. Napi niki Gustin tiange kadung ida ngrayunang nenten makta toya."
"Inggih yan batas yeh, tiang aturin Jerone. Napi sih rereh Jerone mrika kalase."
"Napi tiang ngiring Gustin tiange maboros."
"Men mangkin dija nika Gustin Jerone."
146
