"Drika nika ba dauhne."
"Lamun kenten dong mriki bakta procote, pacang dagingin tiang toya". Enjuhina lantas i panyeroan procot teken I Jrudeh tur lantas jangina yeh. Sasubanne bek, baanga buin I Jrudeh. Mara ukana I Jrudeh magedi, nget dingeha kone ada ling anak cenik. Matakon lantas ia teken i panyeroan,
"Nika sira nika ngeling jumahan meten, Jero Luh?"
"Panak tiange nika".
"Dong madue oka ya Jerone driki."
"Tiang ngelah nika".
"Sareng akuda sih Jerone driki?"
"Ajak tiang tetelu".
"Encen nika malih timpal Jerone".
"Nika napi di paon ba danginan." Dengokina kone lantas panyeroan ane buin dadua teken I Jrudeh. Ngomong ia buin,
"Beh ne makatetelu luh-luh. Bani ja nika Jerone driki paturu istri".
"Ngudiang te tiang tra bani , yen tiang takut, dini ya tiang ngoyong."
"Jerone madue rabi kenten? "
"Tiang ngelah nika, yen tiang tusing ngelah kurenan, ngelah tiang panak !"
"Ah nenten ja kenten napi, baane ten wen ten jene ngenah rabin Jerone driki. Punika awinan tiang nakenang. Men mangkin kija nika rabine?"
"Anak ngrereh bakal jukut, nika. Mrika te sampun mamargi, nyen payu benduina Jerone, makelo antosanga Jerone ngrereh toya!" Keto abet panyeroane, lantas I Jrudeh magedi. Pajalanne sada boncoh. Sasubanne ia nganteg sig linggih Ida Raden Mantrine aturanga lantas yehe ring Ida Raden Mantri. Mataken Ida Raden Mantri,
"Ne dija Paman maan yeh?"
"lrika ba danginne nika." Keto atume I Jrudeh tur lantas aturanga undukne i tunian. Jani madaar kone I Jrudeh. Ida Raden Mantri buin kone ida ngrayunang. Jani sabilang ada panjak len-lenan ento kone daara yeh procote. Sabilang ada len-lenan masih yeh procote ento daara. Nangingke tusing telah-telah baana naar, tileh dogen isinne. Sasubanne pada suba suud madaar Ida Raden
147
