tekan I Punta,
"Paman Punta, Paman Punta, anak uli dija se ento dadi aeng bagusne, kemo kone kaukin tunden mai!" Suba kaukina I Juragan Anom tekan I Punta, lantas Ida Raden Mantri ngandika,
"Jero, Jero, Jerone anak uli dija, tumben ja tepukin tiang Jerone, nyen adan Jerone?" Matur I Juragan Anom,
"Inggih Ratu Raden Mantri titiang jadma pangumbaran, titiang jadma pangumbaran, titiang panak juragan prau, wastan titiang I Juragan Anom. Titiang meriki makta prau gumanti madolan, dagangan titiange sampun telas durus, nanging titiang demen iriki."
Buin ngandika I Raden Mantri,
"Nah, yen keto, jalan ja suba dini nongos ajak Beli, Beli anggon cai nyama-nyamaan."
Keto kone pangandikan Ida Raden Mantri, ngiring kone I Juragan Anom. Sekat ento kone ia seken mamarekan di puri, tur kaeman antuk Ida Raden Mantri, sing taen palas peteng lemah. Praunne muah isinne pakidianga teken timpalne, tur tundena timpalne buin malayar madedagangan.
Kasuen-suen ia mamarekan ditu kacrita Ida Sang Prabu Koripan sungkan raat, tur kanti telah baliane wewengkon Koripan ngaturang tamba, makejang kone sing ada mintulin. Ditu lantas ada juru tenung, nenungin panyungkan idane, patut matamba aji be kedis manuk dewata. Dening keto lantas Ida Raden Mantri ngandikaang I Juragan Anom luas kalase ngalih kedis manuk dewata, tur yen tonden maan, tan kalugra buin matulak.
Tan critanan di jalan, teked kone di alase maileh kone ditu, masih tusing tepukin kedis keto. suba kone peteng, neked kone ia sig pondok Ida Prameswari, lantas ia kema nyilih dunungan, lantas matakon Ida Prameswari,
"Jero, Jero, Jerone anak uli dija, nyen adan Jerone?" Matur I Juragan Anom,
"Inggih Jero Istri, tiang parekan Ida Raden Mantri, wastan tiarige I Juragan Anom. Mangkin tiang kautus antuk Ida Raden Mantri ngrereh kedis manuk dewata, pacang tamban Ida Sang Prabu, tur yen durung polih, tan kalugra tiang matulak ka puri. Niki ragane sapasira, dados pakekalihan paturu istri malinggih iriki?" Ngandika Ida Prameswari sambilang ida nangis.
18
