"Apa ja keto nira neken cai, nira prameswari di Daha, nanging nira lacur kakutang dini ajak nanak Galuh, reh Ida Sang Prabu kalimburan. Pianak nirane ane muani nu di puri, nanging jani yen kenken kaden, yen nu idup apa suba mati." Mara keto pangandikan Ida Prameswari lantas ngeling kone I Juragan Anom, sambilanga ngaturang undukne sakadi-kadi. Ditu lantas ida sareng tetiga saling gelut saling tangisin, reh sami eling ring kasangsaran.
Kacrita buin maninne semengan, buin kone rauh dedarine kemo, lantas Ida Prameswari midartaang indik idane kapanggih ring putrane lanang, tur kapidartaang putrane kautus ngrereh kedis manuk dewata, pacang tamban Ida Sang Prabu Koripan. Ditu lantas dedarine buin tulak ka suargan, nunas kedis manuk dewata teken Ida Betara Guru. Suba kaicen, lantas buin matulak kalase, tur kapaicaang kedise ento teken Ida Raden Mantri Daha. Suba
kone keto, lantas I Juragan Anom mapamit teken biange kalih arine, lakar tulak ka Koripan, tur sumanggup ida pacang sering matetinjo ka alase. Rauh di puri, lantas katurang kedise ento teken Ida Raden Mantri Koripan. Ditu lantas kapangandikaang panyeroane nampah nglantas ngrateng kedise ento, lakar rayunan Ida Sang Prabu, tur di subanne rateng, lantas katur teken Ida Sang Prabu. Sausan Ida ngrayunang be kedise ento, lantas ida
kenak prajani, waluha buka ane suba-suba. Sekat ento kone I Juragan Anom sumingkin kaeman di puri.
Kacritaang gelising satua, sesukat Ida Sang Prabu kenak, pepes gati kone I Juragan Anom ilang uli di puri. Kanti makapuan makatelun kone di alase. Nuju peteng, mara I Juragan Anom teka uli di alase, lantas Ida Raden Mantri mataken,
"Adi, ento kija se Adi dadi pepes gati ilang uli jumah?" Kanti makatelun tusing morahan teken Beli. Kanti paling Beli nundenang nakonang Adi, kija se Adi?" Matur I Juragan Anom,
"Inggih Ratu Raden Mantri napi titiang kadung saud atur, daweg Cokor I Dewa ngandikaang titiang ngrereh manuk dewata, wenten sesangin titiang ring alase. Yen titiang polih paksi sapunika, titiang sumanggup pacang mitung raina mrrika, nginep ring tengah alase, tur tan dados matimpal". Keto kone aturne I Juragan Anom, lantas imeneng kone Ida Raden Mantri. Nuju I Juragan Anom kalase, lantas Ida Raden Mantri lunga kairing baan I Punta,
19
