Sarauh idane di purian raris ida kasapa antuk Ida Sang Prabu kalih Ida Prameswari.
Gelising satua ada suba maletan atiban Ida Raden Mantri marabian, mobot lantas Ida Raden Galuh . Suba jene tutug ulanan bobotane, madrue lantas ida oka lanang, baguse tan perah-perah. Beh ledang pesan kayun Ida Raden Mantri, dening ida madrue oka lanang, mawanan Ida Raden Galuh mawuwuh-wuwuh kasayangang antuk Ida Raden Mantri.
Kacrita jani, sasubanne okane duur, ada lantas tetajen di Pajarakan sig purin I Galuh Likune. Ida Raden Mantri makayun kone ida lunga makeklecan ngandika lantas ida tekan rabinidane,
"Biangne, tiang lakar luas matajen ka Pajarakan, baang tiang ngidih pipis, apang ada anggon tiang ngetohin siape".
"Sampunang ja Beli Bagus makeklecan merika, becikan lianan ja laku makeklecan !" Keto kone aturne Ida Raden Galuh, dening ida suba jejepan kayunne, jalane Ida Raden Mantri demenina nyen teken I Galuh Liku. Kanti ping telu kone Ida Raden Mantri aturina teken Raden Galuh, apang ida tusing lunga ka Pajarakan, masih ida tusing kayun. Dening keto ngandika lantas Ida Raden Galuh teken okane,
"Nanak Bagus, ento ajin Ceninge ngandikaang ka Pajarakan makeklecan . Suba tusing aturin meme ida kema, masih ida tusing kayun." Mara Ida Raden Mantri Anom mireng pangandikan biange keto, matur latas Ida Raden Mantri Anom teken ajine. Atur ida patuh teken atur biange, tusing pesan aturina ajine makeklecan ka Pajarakan. Ida Raden Mantri masih tusing ngrengaang atur putrane keto, ngilis kayunidane lakar lunga dogenan . Dening keto katurin lantas Ida Raden Mantri pipis antuk Ida Raden Galuh . Mamargi lantas Ida Raden Mantri makta ayam kairing ban I Patih. Sarauh idane di tajen payu kone ayam idane makadadua menang. Sasubanne suud tetajene lantas katurin Ida Raden Mantri mantuk ban I Patih. Saur Ida Raden Mantri begbeg enden-enden dogenan. Suba jene sanja, mara kone ida kayun mantuk, ngamarginin ko ida di samping purinne I Galuh Liku . Dadi macunduk Ida Raden Mantri teken I Galuh Liku. Mara tingalina Ida Raden Mantri ban I Galuh Liku raris ida sapana,
"Beg Belig Mantrig, entog Belig Mantrig raug ulig dijag? Sirag ngirig Belig Mantrig?" Masaur Ida Raden Mantri,
45.
