"Beli teka uli matetajen ajak I Patih".
"Meg sampug napig, polig Belig Mantrig, polig?"
"Menang ja Beli abedik."
"Lamug kenteg dog margig simpag dumug kumag tiangeg.
"Ah depin ja suba, kene suba sanja, buin pidanan Beli malali mai". Dening Ida Raden Mantri tusing kayun simpang, dadi gedeg I Galuh Liku. Ngenggalang lantas I Galuh Liku ngalih biangne sambilanga ngeling tur morahan kene aturne,
"Memeg, Memeg, aeg jag gedeg mimbug jengag keneg tiangeg tekeg I Belig Mantrig Koripag, ajakig tiag maig tusig kayug. Jani gaenang tiag gunag, apag budug I Belig Mantrig tekeg tiag!" Dening biangne sayang pesan maoka, dadi gaenangiJ lantas I Galuh Liku guna. Sasubanne keto, pesu lantas ia buin ngalih Ida Raden Mantri. Ida Raden Mantri tonden kone ida budal. Dening ida nu seneng ditu. Ping kuda-kuda kaden suba aturina ida budal teken I Patih masih ida tusing kayun. Jani mara Ida Raden Mantri nyingakin I Galuh Liku, nget jegeg kone cingakina I Galuh Liku tur prajani buduh paling kayunne teken I Galuh Liku. Engsap kone jani ida teken rabi kalih okane. Jani kayun kone Ida Raden Mantri simpang kema ka purin I Galuh Likune. Aturina kone Ida Raden Mantri pacanangan, misi buah beluluk teken base beleng. Rayunanga masih buah beluluke teken belenge antuk Ida Raden Mantri ban suba buduh idane kliwat teken I Galuh Liku. Jaan kone rasaang ida buah beluluke mu ah belenge. I Patih suba kone keweh pesan, dening Ida Raden Mantri tusing kayun mantuk. Ngandika Ida Raden Mantri ring i Patih,
"Paman Patih, nah kema suba mulih maluan, aturang teken Ida Raden Galuh buatne nira buin telun jani lakara mabuncing ngajak i adi Galuh Liku!" Mara keto pangandikan Ida Raden Mantri, tengkejut kone I Patih, nangingke dane tusing bani buin matur,lantas mamargi dane budal ka puri Koripan. Sarauh danene di purian katangkilin lantas Ida Raden Mantri Anom. Ida Raden Mantri Anom nyingak I Patih rauh, raris ida mataken,
"Kaki Patih, ento dadi Kaki padidian mulih, ida Guru Aji dija ida?"
"Matur sisip Ratu Raden Mantri Anom, napi lacur, ajin Cokor I Dewa kantun irika ring Pajarakan, ring I Galuh Likune. Sampun ping kuda-kuda kaden aturin titiang mangda ida mantuk
46
