toyane ento ring Ida Raden Mantri, kanti suba bengkang kone wetengidane, masih tileh dogenan kone toyane atekor. Ento krananne Ida Raden Mantri makayunin Ida Raden Galuh tuara okan panjak, sanistana ko pragusti. Usan ida ngrayunang toya, lantas ida katurin malinggih, tur ditu kone ida matutur-tutur sareng Ida Raden Galuh. Suba jene sanja mantuk lantas Ida Raden Mantri kairing ban I Patih.
Kacrita buin maninne buin kone Ida Raden Mantri lunga maburu tur simpang ka pondok Ida Raden Galuhe. Aketo dogen karyan Ida Raden Mantri sai-sai, makelo-kelo seneng lantas Ida Raden Mantri teken Ida Raden Galuh. Dadi, kajakin kone Ida Raden Galuh marabian. Ida Raden Galuh tan pisan kone ngiring kayun Ida raden Mantri, dening ida kimud pesan marabi ring Ida Raden Mantri, krana salah tanding. Ida Raden Mantri masih kedeh pesan kayunne nganggen Ida Raden Galuh rabi. Dening bes kedeh pesan kayun Ida Raden Mantri ngarsaang Ida Raden Galuh, dadi kayun lantas Ida Raden Galuh, tur suba ida masamaya. Indik Ida Raden Mantri madue pepacangan sing kone uningina teken ajinidane. Dening Ida Raden Mantri muah I Patih tan katurang indike totonan.
Kacrita di buin maninne Ida Raden Matri pacang mendakin Ida Raden Galuh kalase lakar kajak ka puri, kandikaang kone panjake makarya jempana gede pesan malakar ban tiing petung, mangdenne sedeng Ida Raden Galuh malinggih ditu. Ida Sang Prabu nyingakin ja kone ida panjake pada epot ngae bale-balean nangingke ida tusing ja nakenang. Petenge ento ada kone lantas dedari tuun uli suargan lunga ka pondok Ida Raden Galuhe, tur Ida Raden Galuh kakeberang kajak ka suargan. Sarauh idane di suargan lantas Ida Raden Galuh lukata teken dedarine totonan, tur jani suba masalin adeg. Kamulan Ida Raden Galuh gede gangsuh, jani suba dadi cenik langsing adeg lanjar, rambut lantang buin samah tur nyegegang. Sasubanne Ida Raden Galuh malukat, buin ida ajaka tuun teken dedarine. Jani ledang pesan kayun Ida Raden Galuh dening ida suba polih sesupatan, tur anut suba jani ragane masanding teken Ida Raden Mantri. Misi suba sesonggane selepa maan tekepa. Petenge ento sing pesan kone Ida Raden Galuh dadi sirep, dening uyang kayune lakar matemu teken Ida Raden Mantri. Begbeg klesah-klesih dogen kone ida di pamreman.
70
