Jempana tiinge entunganga kone di pangkungane. Suba jene teked parekane di purian, aturanga lantas keto buka pangandikan Ida Raden Mantrine. Beh apa kaden ledang kayun Ida Sang Prabu mara ida mireng atur parekane, tur prajani ida ngandikain panjake luh-luh muah tukang bantene, kandikaang ngae banten pabuncingngan. Len ada buin parekane kandikaang ngejuk celeng. Buina kandikaang masih nuunang jempana mase, pacang kanggen mendakin Ida Raden Galuh. Parekane ngenggalang lantas nyemak jempanane ento, tur lantas majalan kalase mendakin Ida Raden Galuh.
Gelising satua suba jene rauh. Ida Raden Mantri sareng Ida Raden Galuh di purian, lantas ida kasapa antuk Ida Sang Prabu kalih Ida Prameswari tur kandikaang okane munggah ka bale gedene natab. Sasubanne suud natab lantas Ida Sang Prabu matutur-tuturan ring Raden Galuh nuturang paindikane. Ida Sang Prabu ledang pesan kayunidane mireng atur Ida Raden Galuhe.
Critaang jani okan Ida Sang Prabu di Mataun mireng orti, okan Ida Sang Prabu Daha kakutang, dening ida tan nganutin jejeleg manusa. Wireh Ida Raden Mantri Anom meled kayunne mangdene ida uning teken Ida Raden Galuh Gede, raris ida lunga kalase pacang ngrereh Ida Raden Galuh Gede. Rauh jene suba Raden Mantri Anom di pondok Ida Raden Galuh Gedene, mataken raris Ida Raden Mantri Anom teken parekane ane nongosin pondoke totonan, tan lian nakenang Ida Raden Galuh Gede. Dadi aturanga tekan i parekan, Ida Raden Galuh Gede suba masupat tur suba malinggih di puri Koripan. Nanging tusing kone aturanga buatne ida suba marabian. Dening keto aturne i parekan, mamargi lantas Ida Raden Mantri Anom ka Koripan pacang matemu ring Ida Raden Galuh Daha. Sarauh idane di Koripan, mataken raris Ida Raden Mantri Anom tekan Ida Raden Mantri Koripan nakenang Ida Raden Galuh Daha. Ida Raden Galuh Daha sedek kone ida nunun. Patujuina lantas Ida Raden Mantri Anom teken Ida
Raden Mantri Koripan. Wau Ida Raden Mantri Anom nyingak Ida Raden Galuh Daha, dadi buduh kone kayunidane, dasdasan pesu kone pangandikanidane makayun ngidih Ida Raden Galuh Daha. Naningke nu masih ida nyidaang ngeret kayunne. Suba jene sanja mantuk lantas Ida Raden Mantri Anom ka puri Mataun. Sarauh idane di purian, raris ida ngaturang kayunidane seneng teken Ida
72
