165
22. Neked ditu, bengong parangan kapanggih, tur angucap nyawang, "Nggih dewa Janggaketaki, cingak titiang nandang lara.
L. PUH DANGDANG
1. Panes bara sakit nyakitang i gusti tan marawat, lasia twara kija, becikan rasane dini, yan sadia mangda kapangguh, ratu dini maring gili, yan tan aweca Sang Hyang Titah, mangda titiang dini puput, mati ngati-ati ida, keto pragat, budi pageh twara gingsir, misadia nresnin i dewa."
2. Sapunika I Mladprana lintang tiling ring manah, tur dane masila, nuptupang kayune suci, nelasang citane letuh, manunggalang manah budi, turin mamati sarira, kahret ban sarin kayun, ngastawa ida Hyang Ludra, tan ucapan, I Mladprana maring gili, ring Purbawyanjana crita.
3. Kala bangun dane Alit Warsiki wau nekag, manyingakin surat, anuli kambil tulise, wus maca krasa ring kayun, baliin bungkung di kacing, miwah anduk saja ilang, cingakin tur ada silur, bungkung miwah umpal gadang, tur kajemak, jangkutin tur pangelingin, kangen pedih tur mamatbat.
4. "Inggih gusti wyakti dane lintang eling manggeh tresna, tresna dane bisa, jani mangapus magedi, ngaku tresna nguluk-uluk, lek di arep bani duri, mileh nanjang masilihang, sane sayangan i ratu, ratu oranga tresnina, tresna swara, masih ratu teleb nyadin, ngwales ban tresna susrusa.
5. Dong ja awas laksana teken ing munyi malih tresna, ne tresnin kenken ya, apa srusa bisa nampi, malah takut macelekut, sapituduhnya tututin, manuh manahe taresna, bungute turwin juruh, manis jaen ban ngelekang, twara tawang, ya pacang ngawisyanin, mangilut nyakitang basang.
6. Manah titiang mamarna ratu keni siya-muwa, muah pangirut buwana, pamegeng miwah pangasihe, yan tan jati sapunika, nguda elas bani ngalih, anak suba karwan elas, masih serep jani kepung, tong dadi ban megat tresna, manyedihang, jadma pun yah bangsat jalir, tong bisa nampi pitresna.
7. Yan patutang anake ne kadananin ban barana, ayah anggon mayah, yan kadanan tresna asih, tawur antuk bakti lulut, yan mautang tresna munyi, bayah antuk tresna lega, ratu jani siwos kayun, ne ngapus bales ban saja, saja titiang, manah titiang bakti jati, ratu ngwales mitya ujar.
8. Ulat ajer ngajerjer jani magedi masingidan, ngutang umah somah, rarama nyama lan wargi, nuwutang kenehe buwut, tan pangitung ling ing aji, wariga tan karaga, tan pakadang angan kidung, nyama agamane kutang, onya lebur, ati yasa tan kayasin, bwana mabah suba obah."
