nika makejang lantas mabriuk madaar saking basangne mula seduk. Gusti Ngurah Darsana tuara nyidaang nulak gelanne, lantas alon-alon ngajengang.
Jam kutus makejang pada suud madaar. Gusti Ngurah makisid kakamarne lakar masalinan sambilanga menahin verban pamedbed duurne ane merasa sakit, bas tekek. Panganggenne mula kari liu di lemarine sawireh ane abana ka Bali tuah telung setel teken kamben, handuk, lan jaket dogen. Nanging ane saja perluanga surat pindah, sampun hilang anyud kayang tas, sokasi misi gapgapan ane titipanga teken Gek Sri kanggo timpal-timpalne. Mara suud raganne masalinan, lantas mesuang kamben, handuk ane anyar saget macelep Lale Dumilah lantas ngelut Gusti Ngurah saha ngeling sigsigan. Alon-alon Gusti Ngurah nyangkol Lale Dumilah abana ka pasirepanne lantas pasareanga. Lale Dumilah sampun ten tahan lantas niman, ngecup pipi, lan lambenne Gusti Ngurah. Alon-alon Gusti Ngurah ngusuh-usuhin sirah, ngelut baong, bangkiang, ngecup bibihne saking rasa tresnasih, lan angayu bagia pada selamet sida buin matemu.
"Denda, suud ngeling. Tiang suba selamet. Jalan angayubagia teken ane Maha Kuasa ane suba matemuang iraga buka jani. Tiang tusing lakar ngalahin Denda buin. Yen Denda setuju tiang lakar nunas Denda anggon tiang kurenan taken Mamiq lan Inaq dendane. Yen dadi apang ngalemah pepadikan, nanging yen tusing tiang nyadia ngajak denda mararik manut adat iragane di Sasak miwah di Bali. Tiang suba tusing ngelah galah liu. Di Bali tiang suba marembug ajak Ibu lan adin tiange maka dadua. Makejang manut tiang nganten satondene luas ka Kupang. Suratne Gek Sri sujatinne ada, nanging makejang anyud. Urusan pula paline di Sasak, Ibu lan Ajin tiange di Tanjung ane lakar meragatang ajak Wak Pan Kobar. Jani galahe serahang tiang teken
