Denda. Pamutus ada di ragan Denda. Yen nyak mani tiang lakar matur teken Ibu lan Ajin tiange di lanjung sawireh enu ada cuti buin awai. Yen Denda merasa berat, tur enu demen kuliah tiang sing maksa, kenken? Apa buin yen upami Denda merasa berat ninggalin kulewargan Dendane, jani pinehin apang melah, apang tusing mariselsel di kaduriane. i raga ane lakar nyalanin, i raga masih ane patut mutusang. Pangidih tiange abesik, apang patemun i ragane makurenan madasar baan tresnane ane sujati, saking pituduh Sang Hyang Widhi Wasa/ Tuhan ane Maha Kuasa, Maha Tunggal, ane micayang hidup, mati, lan jodohe. Buka raos tiange dugase di Gunung Rinjani yen i raga lakar malayar jalan malayar dadi abesik nuut tukade nganti teked di telenging segarane tan patepi. Sujatinne makejang tukade patuh tatujone ka segara. Nanging yen i raga makurenan patute dadi a perahu, yen sing keto ento madan amung mamitra utawi selingkuh. Patuh buka pajalan istri jalir ane ngulahang ngisinin nafsu birahi. Dumadak apang patemun i ragane tan pegat kayang kawekas mapanak, macucu nganti salawase. Eda Denda walang ati teken tresnan tiange. Nanging yen Denda enu sumanangsaya, apa buin ada tatimbang len, tiang sing kenken. Yen tusing makurenan nah matimpal i raga enu. Tresnane tuah madasar baan lascarya, dumadak denda nemu rahayu, tresnan Dendane lakar aban tiang kayang mati," kenten Gusti Ngurah ngarumrum Lale Dumilah ane kari sedih ngunngun alon ngurut dadanne.
"Ooh Tu Ngurah. Tiang sampun matur ken Tu Ngurah. Keneh tiange sampun nyantep, napi kari sumangsaya? Niki rarisang tues tangkah tiange yen tiang nyidra janji. Utawi kenkenang Tu Ngurah ja awak tiange mangkin, rarisang. I tuni sujatinne tiang mapiguman ngajak Luh Purnama lakar suud kuliah apang ten pegat ming tengah. Di manah tiange sampun manyet yen Tu Ngurah lakar pindah uli deriki.
17
