Tiang tan mitaen lakar digelis sapuniki teka putusane tur Tu Ngurah rauh ngamaluin kena pancabaya. Merasa mati tiang ningeh Tu Ngurah di Rumah Sakit Mataram majalaran saking kelem di pasih. Nanging, syukuuur sayang buah matan tiange selamet, sampunang kalahina tiang malih. Tiang kalintang bagia, nanging dadi kaplegan, kapepenga alah tomplok gentuh madu tan sida baan natakin, napi malih lakar nyiup nyicipin. Tiang satmaka ngalangi di pasih madune Tu Ngurah. Sajawaning waneh, sampunang tiang kampihanga. Tiang tan pantes mangkin maboya, tiang dados ikuh, kangge Tu Ngurah mrabotang awak tiange. Tresnan tiange abesik, wantah niki, sampun serahang tiang ring Tu Ngurah," kenten Lale Dumilah saha ngelut Gusti Ngurah Darsana, tan mari ngecup gagelanne kang kinasih.
"Nah, yen suba keto Denda, tiang masih suba nyantep. Bandingang teken tiang luas padidi ngantiang Denda pragat kuliah buin 4-5 tiban, keneh tiange dadi tusing eneh. Alah apa ke ada ajak ngujegang suunge di katuju mulih uli magae, apang tusing sasai metekin iga-iga. Sawireh galahe mepet gati, melahan mani i raga ka Praya malu nunas tatimbang teken Bli Wiradana satondene matur teken anake lingsir di Sengkol," kenten Gusti Ngurah tan mari iseng nyigit bangkiang gelanne ane langsing, padet maisi.
"Tooooh,...seeeest, aaduuuuuuh geli Tuuu, ah Tu Ngurah nakal. Nyanan tiang pesu panyuh, ngenceh deriki mara ja." Lale Dumilah tan mari milu ngirikin sipah, lan ngecup lambenne Gusti Ngurah nganti ngah-nguh pada namtamin tungtung tresnane mabunga-bunga. Hilang rasa sakit duurne mabencol. Diwangan pada sepi tuara ada bani ngulgul sang kalih mapadu tresna. Made Sinar milu bengong-bengong ngenehang patemun sang kalih. Ada rasa ilik, nanging nyaru matilesang awak yen inget teken pituturne Gusti Ngurah teken dewekne. Wayan
