"Sapuniki Gung Ngurah, Meina puniki mula pianak tiang. Nanging yen nadak mangkin ajak tiang mulih ka Buleleng manawi kirang pantes, santukan kurenan tiange dereng uning tiang ngelah pianak saking Marieta. Tiang kari ngutsahayang mangda ipun nyak ngampurayang kaiwangan tiange. Sajeroning punika manah tiange banggayang Meina mangda tetep tunasang tiang ajengan ring Gung Ngurah dumun, "aturne dr.Nurja.
"Beneh saja keto Meina, buka raos yange ipidan teken Meina apang tusing legan keneh Meinane matemu teken Bapane ngae kulawarganne kisruh. Melahan tuutang malu tutur mamamu di surat wasiate apang matemu malu teken beline di Cakra. Gumantine jani Meina suba nawang tur akuina teken Bapane dr. Nurja. Dumadak apang kurenanne dr. Nurja nyak ngampurayang mamakmu lan narima Meina pinaka panak kualonne," kenten pituturne Gusti Ngurah nyangra aturne dr. Nurja. Makejang pada matutang.
"Inggih sami serahang tiang ring Tuagung sareng Ibu sane nuduk padewekan lan ngurip tiang sane satmaka sampun padem mawinan sida kapanggih ring bapak tiange." Kenten aturne Meina paterebes yeh paningalanne, usuh-usuhine teken Ratna Dumilah.
"Cening Meina, eda cening salah tampi teken omongan bapane. Bapa tusing lakar ngutang anaka buka cening. Baang malu bapa galah makeneh nebus kapelihan bapane. Bapa majanji lakar ngutsahayang ngisinin kaperluan ceninge. Sujatinne dija ke demen ceninge ngoyong, tetep ngiring Gung Ngurah apa lakar nutug beline di Cakra sambilang nutugang sekolah ceninge? Bapa ane lakar meanin cening," kenten pitutur bapanne.
"Nggih depin sampun tiang ngiring Tuagung tur apang katepuk malu teken belin tiange Leonardo utawi Wayan Galang di Cakranegara,"
302
