bingungne.
"Sapunapi Tu Ngurah muputang wicarane niki? Yen Meina iriki sareng titiang, patut santukan ipun manyama sareng Yan Galang. Nanging yen ipun nutug dr.Nurja taler patut santukan Meina mula pianakne. Sujatinne titiang ngaptiang ipun mangda iriki sareng belinne anggen titiang pianak. Sane ngajak nenten ngalekadang, sane ngalekadang nenten ngajak. Indayang Tu Ngurah nepasin," aturne Pan Kobar nunasang pamatut.
"Yen tiang wak, memek, lan Yan Galang, apang tusing marebut melahan ja serahang teken Meina. Meina sing dadi bingbang. Dija ja enteg keneh Meinane ngoyong anak dadi. Maka dadua mula ngelah hubungan. Kadung ajak iyang ngempu Gung Nantha dadi masih," pandikanne Gusti Ngurah nyapsapang pagejuh anake bungeng.
"Beh, sajeroning Gung Nantha kari alit, depin ja tiang ngiring Ibu Ratna ka Rababima. Dija pejang tiang swecane Tuagung sareng sami sane nuduk dewek tiange. Sejaba kenten bapak ngakuang lakar nelpun tiang ka Bima. Napi malih mangkin sampun paak, yen Meina kangen teken beli, elah ben tiang mulih meriki." Pasautne Meina teges.
"Nah, yen suba ento pilihan Meinane mbok dong demen dogen ngajak. Apa buin Gung Nantha sing dadi belas teken Meina uli cerik," raosne Ratna Dumilah nyelag.
"Inggih yen sampun Jro Mekel, Tuagung sane ngajak, durusang," aturne Wayan Rempuh ajak kulawarganne makejang. Aji lan ibunne Gusti Ngurah masih matutang.
Reraosane mangkin magenti baan saling caritain indik pengalamane suang-suang Gek Sri di Denpasar, Meina di Timor lan Made Sinar ngawakilin dedara Sasake sasukate mapasahan ngajak Gusti Ngurah
323
