bakso ikan, cumi, kepiting muah sea foodne. Ratna Dumilah lan Meina magilihan madaar sawireh nyambi majengin Gung Nantha bubuh. Yadiapin masakane jaen, Ratna Dumilah lan Meina dereng seleg nyidaang ngrasanin sawireh bayunne kari runtag, tan sida ngilangang gegambaran panca bayane ane mara alamina I busan. Gusti Ngurah ngibur rabinne ulian nyanden okanne.
"Pak Ngurah, yen di Bali wenten babi guling. Yen deriki kanggeang kambing guling, ha ha ha. Pang panesan bedik mungpung sasih dingin," aturne Pak Syamsudin.
"Beh, ene mula Pak Syam ngelah rerikrikane apang teked di Denpasar sing loyo," kenten gagonjakanne anggon ngilangang sungsut manadi kenyung yadiapin kenyeme masem kecut. Suud pada madaar Pak Syam ngajak muter-muter di Kota Bima ngaliwatin Istana Sultan Bima, ka pelabuhan, ka pasar kota, ka stasiun bus, mara mabalik ka umah dines nandes jam 9.00 peteng. Pak Syamsudin mapamit ka hotel lan Pak Zakaria Kepala Tata Usahane atehanga mulih taken Z. Abduh sopire.
"Selamet malam Pak Ngurah, Ibu. Benjang serah terimane kawentenang deriki di aula Kantor BRI ne, kasaksinin antuk undangan Muspida sareng Kepala Dinas kirang langkung selae diri saha Kepala Cabang BRI Sumbawa lan Dompu kewanten."
"Nggih matur suksma Pak Syam, cukup anggon makenalan dogen apang ten ada ane tandruh yen tiang sampun meriki," pasautne Gusti Ngurah nyalamin timpalne.
"Nggih selamat malem, arsip serah terimane sampun puput santukan Bapak maosang rauh rainane mangkin," aturne Pak Zakaria lantas pada mapamit budal. Kari Mustamar jaga maleme ane majaga di kantor klebat klebet ngundar senter.
360
