Kaca puniki kavalidasi
1.31 GEGURITAN BASUR
Puh Ginada
- "Bapa bongol twara bisa, kewala maan mamunyi, patauan awak kalaran, anak jani liu buruh, bisa mangaduang daya, ulat kasih, basang awake kiruka.
- Pada bisa ngawe daya, manis-manis mamanesin, palapanin dadi janma, eda ngawe peta liu, awak kelih nyandang bisa, teken budi, pineh-pinehang di awak.
- Darma pasajane tulad, bakti ring Dewa da lali, ngelion ngaturang canang, mabakti lantas makidung, sai manyampat di sanggah, Dewa asih, inih purna masekaya.
- Yen mangelah pipis patpat, dadua sepel apang ilid, adasa mangelah jinah, lelima sepel di bungbung, makelo ada antosang, beliang tapih, eda goroh budag ngamah.
- Taine enyen ngawasang, awake liu mabalih, kamben uek pacelompong, jejaitane maingkut, sedih jengah Bapa mulat, awak kelih, pelapanin dadi janma.
- Pelapane buka negak, depang endepan agigis, bas tegeh ban manegak, yan labuh baonge elung, keto dewa jua ingetang, da ngengsapin, sai anggon gegendingan.
- Eda bogbog mocah peta, kedeke tuna-tunain, tenget sekenang mapeta, apang sidine sumaput, eda linyok ring braya, eda jadig, marerama tulah banya.
- Tulah idup jele pisan, makelo taanang gudig, saparipolahe kaon, dadi bannya mungpang laku, berung langu kuat pisan, nyangsang cerik, jelene ngakih dadalan.
- Masastra da gemba-gemba, masih sai plajahin, anggon manyuluhin awak, ala ayune katepuk, sekala niskala kocap, pang da gunggih, bangga ngelah kawisayan.
- Ila manyumbungang awak, kalingke cai nu cenik, ada satuannyane suba, Ida Hyang Betara Wisnu, sareng Ida Hyang Brahma, ngangken sakti, turunan candi pustaka.
103