Kaca puniki kavalidasi
122
- Adung wilangane kocap, meweh pacang mangendonin, pada ngasen katunaang, lacure gumi ngemasin, dadi adung pada mulih, jagat asia telah sampun, nugi malih kaundang, yadin panjak lakar tampi, kaget lacur, baongnyane ya mapunggal.
- Ortane wus kabiaya, mamireng sabeten langit, senggu balian pada osah, kancan lanang kimud sami, miwah ida dane sami, mundur nora bani rauh, inab tong ada aksara, kancan wiku pada nengil, pada ibuk, di kedahe kailangan.
- 10. Yaning menang mangasorang, kanggen rabi ngodag gumi, sami pada sumangsaya, watek panjak manandingin, telas sabeten langit, wicaksana nora purun, kocap saking pura Brata, dane Tamtam mireng mangkin, kuban Hindu, bagus ririh wicaksana.
- Laksanane. suka lila, legawa suka sejati, wiku sami kaparanan, peteng lemah mangulinang, nora sama maring bumi, makenta mangadang sampun, nora olah malaksana, minehin ortane jati, sampun puput, dane Tamtam nimbang manah.
- Idupe mondong sangsara, mangke idup besuk mati, mamanjakin kranjang padang, peteng lemah ya openin, tan wang de tua lantas mati, sane keto pacang tepuk, puput dane nimbang manah, tumuli mabalik mulih, tur kacunduk, meme bapamnyane jumah.
