Kaca puniki kavalidasi
127
- Belognyane kalintang sinipi, memennyane bengong, peteng lemah sai kaajahin, kaurukang antuk guru aji, sai katuturin apang ia tau.
- Meme bapannya keweh di ati, ngelah pianak belog, maselselan dadi buka kene, manumadi tumurun majalmi, nandang sakit ati, lacure kadurus.
- Suba lacur maduluran miskin, siguge kapondong, twara suka nyama brayane, kalingke tresna anak ngolasin, nolih twara sudi, sami twara lingu.
- Dening keto brayannyane sami, manahnyane gaok, tumuli merang teken dewekne, ngutang awak malajahang diri, langgeng di pakerti, laut polih lungguh.
- Sugih rendah pianak luh muani, liu isin kadaton, mas selaka manik sarwa mule, tur kicen manik sekecap lewih, ririhe tan sipi, ayune manerus.
- Beleg lacure buka sapsapin, krana buka keto, luh muani pageh pakertine, di alas, gununge pingit-pingit, nene kasusupin, twara bisa takut.
- Dening keto kawuwuhin Kawi, sami pada gaok, luh muani nyama brayane, tua cerik bajang lan teruni, sami pada asih, suka olas asung.
- Keto tuturan anake miskin, lacur tur ia belog, laut langgeng teken pakertine, yan tunaan takut teken weci, twara manepukin, ane lakar ayu.