Kaca puniki kavalidasi
132
- ngipiane patuh, mabriug sareng katah, krana susah belasat ribut ring budi manandang kabiyaparan.
- Ri sampune lemah kanten malih, mijil senjata Betara Kresna, Si Bajranaba wastane, pican Hyang Ageni dumun, duking kandawawana nguni, rata miwah kudania, katon deseng Yadu, mamargi ngambah segara, miwah tunggul garudane sampun kambil, antuking Widiyadara.
- Miwah tunggul taladwaja malih, tutunggule Raja Baladewa, masi tan kari kaamet, ring Widiyadara sampun, krana susah sang Yadu Wresni, ngatonang durmanggala, laris sang sinuun, Prabu Kresna Baladewa, mandauhang ri sang watek Yadu sami, arsa lunga masiram.
- Maring Prabasa Tirta pesisir, nglila-lila tur sampun sayaga, dabdaban praya lungane, gajah kuda makumpul, rata sampun cumadang sami, praya matirta yatra, sregep sami cukup, katkaning pasesanguan, wadwa katah kadauhan praya ngiring, len dadi juru sandang.
- Dedauhan sane ring jro puri, sampun watra praya ngiring samian, sakatah para istrine, rabine sang sinuun, Kanjeng Susunan Harimurti, prameswari pamuntat, putrining sang wiku, sang wiku Kapi Jambawan, peparabe prameswari Jambawati, ibune Arya Samba.
- Sajawining tiga prameswari, rangkung katah prarabi punika, yen sami cacak wastane, rabine jeng sinuun, maharaja ring Dwarawati, mangde pisan cutetang, gebogane itung, kodaring Musala Parwa, cacakane samian kanemblas tali, rauhing padmi tiga.
- Sane munggah soring prameswari, katahe limang tali ping tiga, mawuwuh sangangatuse, nanggu siadasa pitu, sami kadaden Widiyadara, saking Wisnu bawana, krana sami ayu, katah putih lengkiang-lengkiang, sada panjang pokirana muluk manis, alise tadah punah.
- Masih katah sane nyandat gading, raga singset tadah sada kenyang, sada akas bebalunge, aksine maksi nyunyur, nanging matara galak amanis, pantes juru panggo-
