Kaca puniki kavalidasi
1.56 GEGURITAN RUSAK BULELENG
Puh Durma
- Kandan Bulelenge maarep-arepan, mamusuh ka Betawi, ring I Tuan Besar, kene reko kandannya, mula buktannyane nguni, I Tuan Besar, mangraos ring Betawi.
- Mangraosang para ratune makejang, ring Sasak miwah Bali, dening maasihan, sami teken Olanda, uli lawas kancang jani, I Tuan Besar, rupa ngalih-alihin.
- Mangadaang pasobaya mailehan, para ratune sami, Bali. miwah Sasak, apang patuh pajalan, tingkahe cara Betawi, munggwing sobaya rauhing para aji.
- Yen ada prau kandas karusakan, ring paswan sal1h tunggil, apang mangsampas, manjarah tawan karang, dening ya mamanggih sakit, kawenangannya, olasin ya tulungin.
- Ambulto kapatutan cara Olanda, dening ya ne nulungin, ada pangupaha, patuas anak olas, apang eda buka jani, janma mamanggih, sangkala ya rajahin.
- Sapunika puput raos I Tuan Besar, sampun munggah ring tulis, raris mautus an, mider manggawa surat, ne kautus anak ririh, tosing Olanda, maumah ring Besuki.
- Maparab Indrik Tangkub Awuskupman, ento pepatih ririh, liwat kapercaya, apan suba satimbang, pangraose teken Gusti, I Tuan Besar, ne agung ring Betawi.
- Para agunge ring Bali sampun katuran, surat sami masiki, Klungkung Gianyar, Badung muah Tabanan, Karangasem muah Mengwi, Buleleng miwah, ring Sasak tuah asiki.
- Ida para agunge sami sampun ica, enak teka nagingin, kadi pasobaya, becik teka maasihan, utusane ular-alir, galang apadang, pada saling kirimin.
- Nanging wenten kadi kari manyeleka, raose ne ring Bali, mantuke ka Sasak, nene kalih negara, rupa petutu teken ati, ring Karangasem, Buleleng nyarengin.
173
