Kaca puniki kavalidasi
186
- Ban kalewang papasten mapontang lima, tetatahane ceping ngulelam, ngaranyab, mingid tajep mapangan, ne ngawa bagus caliring, tosing pragina, Anake Agung riin.
- Bau rauh I Gusti kanten kacacah, ngunus kelewang ningkrik, sasolah pratama, caliring kanten jenglar, manyidra cacep nimbangin, waged ing yuda, tan kulug solah tangkis.
- Bau tampek i amuk matangkep yuda, kasempal kaduunin, tuara maan poleh, sing bikasang, kena pindo ping telu kabanin, nging tuara binglak, teguhe tidong gigis.
- Kangin sue yudane pasaling cidra, kelewange magatik, mangkep maruketan, ngurepak pakurempang, sembar kelewange kadi, tatit sawangang, ngulapin Sanghyang Urip.
- Matujuin ambahe manungkap suargan, ka Siwaloka lewih, aketo kaucap, sang pageh tapa brata, purusa dira ring jurit, Ida Sang Parta, makawimbanya jati.
- Ring awiwaha ida njayeng patepan, pageh ida ngastuti, ring Betara Tiga, maulih palugraha, pasupati sastra pingit, panglepas jiwa, saha pawisik jati.
- Dadi ngawag i emuk nyempal ngenaang, anging katuju ngamis, I Gede malecat, papelengane cemal, masleog elu kaambil, keni kacidra, punika kanggen nigtig.
- Kapulangin tendase lasia apisan, batu kangge ngeludin, mangreng. manyujegegag, polone sambeh buyar, minyak mitan sekalis, kumendelanga, tui telas paleketik.
- Kengin bebas i amuk madem manyempang, kulkule mangembutin, rauh ka kota Cakra, pada nimbal katimbal, ngareteng munyinya titir, buka badingang, pekene alah undit.
- Mauram uyut dagang buka ingsah, ada malaib mulih, ngutang padagangan, ada mamunyi keras, sambilanga ya malaib, makabiritan, di pekene ulah-ulih.
- Dadong tua kagiat ya bangun magegas, manyaup esok gelis, paling pati jemak, idep pacang timpesang, jajane kal aba mulih, teka biokang, anyudang di jlinjing.