Kaca puniki kavalidasi
202
- jurang, luih kapranantikane, satsat kadutan maaud, tuara ada buin nyantulin, nene maka larapan ento ne tetelu, suba sida matunggalan, antuk Ida, yen suba blasang buin, antuk pakayun nirmala.
- Ida ento ne kaucap wikan manuutang, eboke sanunggal, manyujur tan pamengane, ida tui maraga Tuduh, pacang nyujur genahe pingit, mapenjekan surya-bulan, sang maraga putus, antuk ide sang ngincepang pranantikan, yen suba kenehe ening ento ambah ka niskala.
- Pakantenan ento ya patuh teken kamoksan yen suba kaungguan, nirmala sai kenehe, tuara katelek di kayun, teken kasukane dini, ida tan kraket tresna, ya mawak manegul, makrana dadi sangsara to mawanan, ida sang kaucap luih, ngejohin suka sekala.
- Sapunika pangandikan Sang Sri Sutasoma, mawarah kadarman, pamuput kalepaksane, buat kasusupang sampun, saluiring pidarta sami, sami lega sang tiga, raris ngastu pungku, ngabakti kalih nunasang, mangde sueca, ida malih nganikain, pamuput luihing yoga.
- Malih Ida Sang Sri Sutasoma mangandika, "Nah yan suba karesep, buat tingkah tan pakantine, ene ada buin kawuwus, sadangga yogane luih, gegelaran Wiku Siwa, maraga luih putus, kaucap utama pisan, ne dingehang, prati yoga makadi, anggon ninggalin indria.
- Nanging iya masih dulurin idep utama, ne buin kaucap, dianadirayogane, asing-asing buatang ipun, malarapan pagehing budi, momo idepe johang, sai ngawe bingung, ada buin pranayama, i pramana, kumpulang dadiang abesik, di jeroning windu adnyana,
- Saanan babahane matutup baan iya, yan manut ban ngelarang, katepuk, kautamane, buin ide ne mungguh, di jeroning garba makadi, I Ongkara Pranawa, tingkah Siwa putus, to madan Drana Yoga, luih pisan, buin Tarka Yoga makadi, tingkah gegelaren Siwa.
- Upaminya buka langite kasamplahan, idepe nirmala, kewala ada binane, dilangite ada tungguh, manguruh gede
