Kaca puniki kavalidasi
88
- Kaget rauh, reramannya nyai Ayu, mangiter di banjar, endi pada manyagjagin, wenten satus, wargin nyia Ayune teka.
- Nene kakung, epuh nyaup nyai Ayu, raris ngaras niman, nyai Ayu apang tindih, teken sanggup, sangke tane bareng mati.
- Beli Bagus, titiang tindih teken sanggup, yaning Beli pejah, depang titiang malu mati, tuara takut, titiang pejah masarengan.
- Yen kasuduk, katumbak luir kasangkut, tuara titiang maras, lamun sareng teken Beli, titiang tulus, tresna ngiring Beli pejah.
- Raris rauh, wargine nyai Ayu, mangerebut manumbak, ne istri kagelut kabin, nene kakung, tinumbak timbal-tinimbal.
- Ada nyunduk, manyohcoh weteng manyangkut, kodian tatunnya, dekdek remuk buka sitsit, nyai Ayu, kari urip kapasahang.
- Nene lampus, layone kadi aturu, kangin ikang waja, mangliep luir kenying-kenying, ngawe lingsung, sedih anak majahang.
- Gading lumlum, layone di samping rurung, alise malenyad, tajep bukah manatunin, tuhu bagus, sing ngenot sedih makejang.
- Mirib kenyung, layone mimbuh abagus, nungkayak ngrempayak, ngawe kasandu ring margi, sing lumaku, sedih pada mamangenang.
- Nyai Ayu, kaateh mantuk makubun, buka tan paatma, mangrerantun ia ring margi, jeneng nutug, atmane ring sang apejah.
- Nyai Ayu, kocap mangkin sampun rauh, mangraris mulihan, kumah meten laut ngeling, Beli Bagus, juang titiang enggal-enggal.
- Gelisang Ratu, ajak titiang bareng lampus, sakit san
