Kesusastran Bali Purwa
ditu ia myasa, matapa, ngredana ida Betara né mlinggih di pucuk gunungé. Suén-suén ida Betara rauh marupa anak lingsir, ngadeg di arep I Trunané tur ngandika kéné, “mangujang cai Truna dini pang makelo? Ento kema laku ka gumi anu, ditu karman cainé! Ratuné ditu madué putra istri aukud jegeg pesan, né jani ajinné kakéwehan nglawan musuhné sakti maya-maya, raksasa buin aéng suba ngratu dini di alasé. Ento apang sida ban cai ngamatiang nlahang sekancan raksasané totonan, cai maan upah okan Ratuné ento tur cai nyilurin dadi ratu ditu, ngrahayuang guminé. Nah né baanga cai panugrahan manik sekecap sidi mandi. Nah dong selépang layah cainé!” Mara kéto pangandikan anaké lingsir, selépanga layahné, lantas kecuhina baan anaké lingsir, nikaang ngelekang paesné. Gelekanga baan I Truna Bagus tur ia ngaturang bakti, nunas pasuécan ida Betara. Betara ilang tan prawat matra. I Truna Bagus majalan nuut tuduh Widiné ngelod kanginan dogén.
Gelising satua énggal teked reko ia di guminé gédé kelod kangin. Ida sang Prabu, né ditu madué putra istri aukud jegeg pesan, sedeng mengpeng anom. Gumin idané katekén musuh raksasa galak-galak buin sakti, gédé agul-agul, mamangsa- mangsa jlema, sai-sai teka ka néeara nguug-nguugin. Telah panjak ida mlaib pati lebang-lebangin, asing bakatanga ban raksasané, ento matianga amaha; céréta getihné, barang dadua, barang telu, patpat, adasa. Béh makacakan tulang jlemané lepeh-lepehanga ban raksasané ento di jalan-jalan. Ento krana kéweh guminé ngiring ida sang Prabu, lantas ada saud pangandikan ida sang Prabu, “nah, né jani nira masobya, nyén ja nyidyang ngamatiang raksasa ento, ia bakal jenenganga agung, bakal baang nyuang panak ira sang putri,” kéto pangandikan idané suba kajarawak di négaran idané. Panjak idané yadin para ménaka makejang sing pesan ada nyidayang, wiréh raksasané ento sakti tur bisa maya-maya. Sedekan anak mapauman di bancingah, I Truna Bagus teka
131
