Kembang Rampé
Kacerita teked lantas ia di suargan, ida Betara Guru kagaok, raris ngandika tekén I Raré Sigaran, "ih Sigaran, apa alih cai?"
Matur lantas I Raré Sigaran, "inggih Ratu Betara, titiang ngrereh nyaman titiangé sané malih asibak."
"Nah kema alih nyaman cainé ditu, anak ia suba dadi igel-igelan."
"Inggih Ratu Betara." Alih-alihina lantas nyamanné di tingos igel-igelané, nget bangkung dogén tepukina ditu turmaning makejang maplangka. Matur I Raré Sigaran, "Ratu Betara nyaman titiangé?"
"Tidong né kutawing paras".
"Ten nak nika sampun Ratu Betara," kéto aturné I Raré Sigaran, tur atepanga lantas parasé ento di awakné, teka nyak madeket tur patuh pesan gobanné.
Sampun I Raré Sigaran marupa jlema, lantas kapangandikaang mulih tekén ida Betara.
I Raré Sigaran laut matur, "yéning palungguh Betara ngicén ja dedari Supraba, titiang ngiring pakayunan palungguh Betara." Ida Betara tan ica. Déning bes kedeh I Raré Sigaran mapinunas, pamragat ia kaicén dedari Supraba. Ré suba mapikolih pakeneh-kenahan, I Raré Sigaran lantas mapamit mulih.
Gelising satua, teked suba jumahné, dapetanga méménné berag gati kabetek baan sedihné makelo kalahin pianak. Jani mara teka pianakné, ngon tur kendel pesan koné ia, wiréh pianakné suba mawak abungkul.
"Béh, I cening teka kadén mémé cening suba mati. Né nyén né, dadi cening ngajak anak luh jegeg?" Masaut lantas pianakné nuturang buat pajalanné neke di suargan. Suba kéto, jani dedari Supraba lantas ngaji umah sagenepan miwah panjak liu. Sami kaapti olih dedari Supraba mrasidayang ada; umah bagus lan panjak liu. Ditu lantas I Raré Sigaran nyeneng agung tur negarané ento kaadanin negara Sigaran.
124
