Kesusastran Bali Purwa
Suba kéto nglaut ia mulih mapanganggo belus. Di subané neked jumahné, ngenggalang ia meséh. Ditu ia mara mrasa jengah pesan, inget tekén undukné mablanja masih tondén mayah, kandugi ngencolang ia nyemak pipis tur katitipang katundénang mayah pamelin dedaraanné, né daara i busan.
Uling sekat ento I Wayan Sébetan tusing pati juari pesu nganggur. Dulurin liu anaké pada nyenggakang, kéné sesenggakan né, "sasukaté ngelah punyan pipis taén ngelekan tain cicing."
Nah jani buin ceritaang Pan Angklung Gadang. Suba koné kasuén-suén, lantas ada saya teka ngarahin Pan Angklung Gadang, "Bapa Angklung Gadang, icang mapangarah, buin mani sangkepané di banjar, apang bapa mungkah utang bapané di banjar. Yén tusing nyidaang mungkah buin mani, umah bapané lakar maadep tekén banjaré, salah bapané ban tusing mayah putra duk sangkepané duang sasih, dadi nikel putra. Buin duk sangkepané né abulan, masih bapa tusing mayah putra, sangkal nikel ina. Bapa mutrainin siu dadi jani duang tali, buin mani bapa sengkerné mungkah", kéto munyin anaké mapangarah, laut magedi.
Jani Pan Angklung Gadang buin nuptupang daya, laut ngaukin kurenanné, "méménné, awaké buin mani lakar nekaang tamiu tegakang duang balé, lakar ingu aji nasi, jalan tragiang uli jani, ento kucit nyainé tampah anggon lawar." Suba koné kéto, lantas Pan Angklung Gadang nyemak blakas nektek kayu atugel kapindahang tungked mlengget tur mapotang-potang, lantas pulasa aji mangsi, mapontang-pontangan baan kudrang barak muah gadang. Béh, luung pesan paputrun warnanné, tur tenget goban tungkedé ento. Buin maninné palimunan Pan Angklung Gadang nampah lantas nglawar. Kurenanné di paon nyakan laut nglablab jukut.
Nah, suba koné tengai, kacerita suba suud malebengan tur pragat ngadonan lawar, jejeruk, jukut, makejang suba
69
