Kesusastran Bali Purwa
mara ia ningeh pamunyin panakné buka kéto. Dadi ampakin dogén ia jlanan tur I Pucung ngenggalang macelep kumah meten, tur lantas ia ngancingin jlanan uli jumahan. Petiné pejanga koné di pasaréané.
Ceritaang jani suba tengah leméng tur mémé bapané suba melah pulesné pada, ditu lantas ia buin ngomong ngrumrum isin petiné, "inggih Ratus Radén Galuh, matangi cokor I Déwa, niki sampun wengi, mriki mangkin palungguhan cokor I Déwa merem sareng titiang!" Suud ia ngomong kéto, lantas sreg jemaka tur petiné ungkabanga. Mara petiné ento ungkabanga, tengkejut pesan I Pucung déning petiné misi macan. Ditu lantas I Pucung sarapa tekén macan. Mati lantas I Pucung.
Buin mani semngané, dunduna lantas ia tekén méménné uli di wangan, déning suba tengai ia tondén bangun. Kadéna panakné sajaan ngajak Radén Galuh. Kanti ping telu koné méménné makaukan, masih sing koné sautina, lantas tinjaka koné jelananné. Ya mara mampakan jlanané, ya magroéngan lantas macané jumahan. Beh apa kadén tengkejut méméné tur ia buin ngenggalang ngubetang jlanan. Ditu lantas ia gelur-gelur ngidih tulungan tekén pisagané ditu. Liu pada Anaké nyagjagin tur makejang pada ngaba sikep. Ditu lantas matianga macané totonan. Sasubané I Macan mati, mulihan lantas méménné, dapetanga panakné suba mati tur nu tulang-tulangné dogén.
14. Pan Belog
Sedek dina anu Pan Belog tundéna ka peken tekén kurenanné meli bébék dadua, lakar tampaha anggon banten, krana matuané buin maniné tutug abulan pitung dina. Kéné munyinné tekén Pan Belog, "ih Bapanné, kéné cai suba nawang, buin mani I Bapa tutug abulan pitung dina, buina icang repot pesan magarapan, tusing icang maan magedi kija-kija. Kema jani cai ka peken meli bébék dadua, pilihin
79
