Kesusastran Bali Purwa
bébéké ento di tukadé." Buin matakon kurenanné nyesedang krana ia tusing ngerti baan kurenanné ngorahang bébék puyung. Kéné munyinné, "puyung-puyung kénkén ja bébéké Bapanné?"
Ditu Pan Belog nuturang saunduk-undukné di tengah jalan. Baan bébéké tuara nyilem, ento krana dadi bébéké orahanga puyung. Bengong turing sebet kurenanné ningehang tutur Pan Belog buka kéto. Ditu lantas ia ngeling, mangenang déwékné ngelah somah kaliwat belog ludin lacur. Pipis ilang bébék tuara bakat.
15. Mén Tiwas tekén Mén Sugih
Ada tuturan satua Mén Sugih ajaka Mén Tiwas. Kacerita ada anak madan Mén Tiwas, ngelah pianak dadua luh muani. ia ngelah pisaga madan Mén Sugih, masih ngelah pianak dadua luh muani. Mén Tiwas, tiwas pesan, gegaénné tuah ngalih saang adep-adepa ka peken. Pamelin saangné totonan uupanga baas. Yén tuara maan madepan saang, ia tuara nyakan, sawiréh tusing pesan ada gegaéné lénan ané sedeng angkuhanga. Mén Sugih, sugih pesan, rasa apa ko tuara kuangan. Nangingké ia banggi, loba, lan paricoda tekén anak lacur.
Kacerita sedek dina anu, Mén Sugih ngunya kumah Mén Tiwasé. Teked ditu dapetanga pianak Mén Tiwasé ngeling nagih nasi, sawiréh uling ibi tuara madaar. Ditu lantas Mén Sugih matakon tekén Mén Tiwas, "mén Tiwas dadi depin pianak nyainé ngeling nagih nasi, kénkén nyai tondén nyakan?"
Masaut Mén Tiwas, "apa ja jakan icang, kadirasa baas abatu tuara ngelah. Ngadep saang tuara payu. Embok nyak meli saang icange?"
Masaut Mén Sugih, "oké sing maan meli saang. Saang okéné ngebekin glebeg. Lamun nyak ja nyai ngalihin oké kutu, nyanan upahina ja nyai baas acrongcong!" Nyak lantas
