Kesusastran Bali Purwa
16. Bagus Diarsa
Ada orah-orahan satua I Bagus Diarsa. I Bagus Diarsa jlema tiwas pisan tur geginané mamotohin. Sai-sai ia matajén nanging sing taén magelar liu.
Sedek dina anu ia matajén ka bancingah, magelar tuah samas rupiah. Sasubané tajéné makiré suud pipisné tuah satus dogén nu. I Bagus Diarsa lantas pesu uli kalangan tajéné, ngojog sig dagang nasiné. Lianan tekén Bagus Diarsa, ada masih anak tua ditu. Anaké tua ento berung tur bonné
bengu pesan. Makejang anaké ngedesem, tur pada nekep cunguh mara ngadek bon anaké tua ento. Anaké tua ento ngomong ngojog sig tongos I Bagus Diarsa madaar. I dagang nasi lantas nekep cunguh krana tusing duga baan ngadek bon Anaké tua ento. Anaké tua ento lantas ngomong "jero, jero
icen ja titiang nglungsur carikané akidik, mangda nyidaang titiang nglanturang mamargi!"
I Bagus Diarsa lantas masaut, "nguda carikan arsaang jeroné, mriki munggah, tiang tumbasanga ragané ajengan".
Anaké tua ento buin ngomong, "nénten, kanggen titiang lungsuran jeroné".
I Bagus Diarsa masaut, "sampunang ngarsaang carikan titiangé, jero dagang nasi baang anaké odah nasi kayang bé!" Anaké odah lantas bareng-bareng madaar. Sasubané pada suud madaar lantas anaké odah ngomong, "jero, apa tiang oon pesan, icén ja tiang madunungan".
I Bagus Diarsa masaut, "inggih ngiring!" Anaké odah lantas ajaka ka umahné, I Bagus Diarsa lantas ngomong tekén kurenanné, "Mén Cening, kebatang tikehe ma! Anaké odah lakar madunungan". Kurenanné ngénggalang ngebatang tikeh lakar tongos anaké tua negak. I Bagus Diarsa buin ngomong, "Mén Cening, nu ada baas?"
Kurenanné masaut, "apa sing ada nu, maan nganggeh baas amonto suba jakan i cening".
I Bagus Diarsa buin ngomong, "nah yan sing nu, kema
