Kesusastran Bali Purwa
Diarsa nututin uli duri. Yén I Bagus Diarsa mrérén, bulun siape ento masih nengil. Yén suba segeran kenehné, buin bulun siapé makeber. Kocap pajalanné sawat pesan, menék gunung tuun jurang, nylupsup ka tengah-tengah alasé.
Tan kacerita, népukin ia puri kaliwat melah, tur di jabaan puriné misi punyan bingin. Bulun siapé nglantas macelep, ia nengil di batan binginé. Mara bulun siapé ento teka, Ida Betara Siwa suba uning, lantas Ida ngandika tekén anaké cerik, “cai to Bapan cainé jenenga teka, kema delokin pesu ma!” Anaké cerik ento ngénggalang pesu mapagin bapanné, tepukina negak di batan punyan binginé.
I Bagus Diarsa lantas ngomong, “yéh cening lan suba. Tusing taén tepukin bapa men dija kubun anaké tua?”
Panakné lantas masaut, “eh anak tua apa, Betara Siwa ento, jani Bapa kapangandikaang ngajeroang tangkil!” Suud ngomong kéto, lantas bapanné kaateh ngajeroang. Ida Betara Siwa lantas ngandika sinambi ica, “ih cai Bagus Diarsa, cai mara teka?”
I Bagus Diarsa lantas matur, “inggih titiang wau pisan, Ratu Betara”.
Ida Betara malih ngandika, “nah lamun kéto kema ja alihang ibané nasi malu! Nyanan pilihin men siape!” I Bagus Diarsa lantas nyumbah, tur mapamit lakar ngelungsur, atehanga tekén pianakné. Ia ko baanga nasi tuah akepel, misi be tuah abedik, masih misi jukut tuah abedik. Sabilang nasiné daara, nu buin akepel. Makelo-kelo kanti betek basangné, nanging nasiné nu masih amonto. Sasubané ia suud ngalih nasi bin ia nangkil tekén Ida Betara. Ida Betara lantas ngandika, “nah kema cai iwasin siapé, ané encén ja demenin jeg juang!” I Bagus Diarsa lantas mapamit sambilanga nyumbah. Ditu tepukina siap tetelu, makejang melah ulesné. Tusing makelo lantas makruyuk abesik, “pek, pek kukuruyuk, tiang menang ping molas.” Buin kejepné ané lenan, mamunyi, “pek, pek kukuruyuk tiang ngalahang sang
89
