Kasuen - suen tutug ulanan belingne, lekad pianakne magoba jlema tuah asibak, mlima batis, mamata, makuping pada maneh. Rahayu dilekadne tan patulungan, kewala kesiab kenehne Ni Ubuh baane ngelah pianak tuah asibak. Inget teken pangandikan Betara Saryane di pangipian, melahahga ngubuhin pianakne, seger oger lunas lanus, laut adanina I Sigir, artinne I Sibak. Api keto ia asibak, di subanne kelih patut wenang bisa mamunyi, bisa nyemak, bisa majalan; ngenken ko ia nyidaang, kewala nganehin. Majalan ia kecog-kecog cara ketugtug. Makejang anake kapiolasan teken anake cerik, I Sigir; asing nepukin asing ningeh teken undukne keto, teka pada ngamaang ia padana, ada maang dedaaran, ada maang pipis, magenep - genepan, idep satmaka sugih Men Sigir ulihan panekan pianakne kadanan. Ne jani suba reko ia kelihan, ngresep munyi, nawang matujuhang kangin-kauh, kaja kelod, ngomong I Sigir teken memenne, "Meme, Meme engken Bapan icang nguda icang sing nawang? sing cang ngelah bapa. Me?"
Masaut memenne, "Apa kemad meme teken i Dewa, lacur i Dewa tumbuhang meme; sing ja ngelah bapa".
Masaut pianakne, "Sing cang ngelah Bapa? sangkal ada icang, nyen ngadakang dadi lekad kene icang, tusing cara anak lenan, genep ukudan? Mabatis tah aneh, mlima tah abesik, mamata masi abesik, mabungut atebih, apa men kene? Eh Me, encen bapan cang Me, sing Me nyak ngorahang? Mun sing, cang kal magedi, lek pasajane atin cange, pang san cang mati, nyak kija ditu".
Lantas masaut memenne, "Nah keto ja raos i Dewa, ento ajin i Dewane Betara Surya, mlinggih di tanggun langite barak barak ne kangin".
Masaut pianakne, "Nah lamun keto, bekelin icang ketipat taluh abesik, teken be taluh siap abungkul; jumah suba Meme, icang kema luas ngalih bapan icange sing ja makelo icang teka". Keto tembaanga baan memenne pangelingina, "Da i Dewa kema, anak joh dija kaden guminne; seda i Dewa di jalan-jalan, dija alih meme? Meneng i Dewa jumah; apa i Dewa kuangan? Meme alihanga i Dewa".
Masaut pianakne, "Apa kuangan, kuangan awak; dija perah anak kene buka icange asibak? Sing, kema Meme ngae tipat, mani pasemengan pesan icang majalan!" Apa keto lejeh panagih pianak ne, gaenanga katipat buka panagihne bakal bekelanga.
Gelising satua enggal, mani semenganne nu ruput, majalan I
- 119 -
