Sigir ngedirdir teka beneng kangin dogen, ngungseng barak langite, tongos suryane endag.
Kacrita di jalan liu anake nepukin ia pada jejeh mlaib, ka-dena gook memedi. Ada ne ngorahang tonya. Ada anak matekap tepukina bakat ojoga, rengas sampinne, sing itang-itung palaibne; ne nekapang kanti bah bangun ngedetin talin sampinne, kene abet-ne, "Ne jlema kenken teka tuah asibak ngrengas - ngrengasang sampi dogen? Berek tonya, tonya apa iba?"
Masaut I Sigir, "Da jerone tengkejut, yang jlema mala, pa-tujuin tiang ngalih bapan tiange Betara Surya di tanggun langite". Anake matekap masaut pedih ngambros, "Saling iba jlema asibak nagih ngalih ngalih tanggun langite, anake nu genep ukudan sing nawang kema". Buin majalan I Sigir ngecogcog. Nepukin ia anak tua ngangon sampi selem jagiran buin galak nyenggot-nyenggotin, ento takonina baan I Sibak ento, "Jero, jero anak odah, kija lakun tiang ngalih bapan tiange? Kone di tanggun langite ne barak ne kangin".
Masaut anake tua, "Ne cai nyen kone tuah asibak?"
"Titiang nika I Sigir".
"Nah lamun cai nyak ngupahin kaki katipat taluh mebe taluh abungkul, kaki patujuhina cai mambahan kema".
Masaut I Sigir, "Inggih, niki tiang muat jaja katipat taluh mulam taluh asiki, niki ambil". Lantas baanga anake odah katipate teken taluhe, tampina baan anake odah totonan, laut daara. Suud anake odah madaar, lantas ngomong kene, "Cai Sigir, ne sampin kakine tegakin, apang enggal cai teked ditu".
Masaut I Sigir, "Sampi galak, bani tiang?"
Masaut anake odah, "Nguda sing bani". Suba keto, camoka bungut sampine baan anake odah, baanga I Sigir talinne, penekanga ia katundun sampine tegakanga, negak reko ia ditu. Suba melah tegakne, pecutina ban anake odah jit sampine, napi macuet mlaib sampine alah mimis, meteng ditu beneng kangin, kanti sing bani kedat I Sigir di tundun sampine; bin kenyengne teked ia di tanggun gumine kangin sig lawanganidane Betara Surya medal. Teked ditu I Sigir, sedeng melaha Ida Betara medal bakal nyuluh-in gumine. I Sigir ia matur, "Ratu Betara Surya, Ratu reke ngardi titiang, mawinan wenten titiang sapuniki. mrupa tan genep masikian, mangkin titiang rauh nangkilang dewek ring Betara, mangda
- 120 -
