PAOS II
SATUA-SATUA
1. S I A P B A D E N G
Ada tuturan satua I Siap Badeng, ngelah kone pianak asepala cerik-cerik nu kolag-kolagan. Sai-sai ia ngalih amah ka tengah-tengah umane muah kebet-kebete ajaka pianakne. Nuju I Siap Badeng ngalih amah kebete, tepukina lantas teken I Lutung.
"Bih, ne ada Siap ngajak panak asepala mai ngalih amah, kenkenang baan madaya apang bakat panakne, apang taen ngamah be siap" Keto kone kenehne I Lutung, lantas paakina I Siap Badeng. "Teked dija nyai lakar ngalih amah?" Masaut I Siap Badeng,
"Teked dini ba dajanne". Matakon buin I Lutung,
"Nyanan kali kenken nyai lakar mulih?,
"Nyanan sanja".
"Nyanan dija nyai medem?" Masaut I Siap Badeng,
"Ngenken sih tuting pepedeman okene takonang cai? Ija ja
petengan ditu oke medem".
Gelising satua, kacrita peteng kone suba, ditu lantas I Lutung nyliksik ngalih-ngalihin I Siap Badeng, nanging sing tepukina. Buin maninne sedekan I Lutung mlali-lali, tepukina lantas tain siap mabrarakan di batan kayune.
"Bih, ne dini ibi sanja I Siap Badeng medem. Nyanan peteng- ne mai bakal alih". Bin kejepne bakat papasa kone I Siap Badeng mrerod teken I Lutung, ditu lantas I Lutung buin matakon,
"Siap Badeng, nyanan dija nyai lakar medem?"
"Ngenken sih I Lutung begbeg nakonang okene dogen, cai nagih mencanen panak okene?"
"Sing apang tawang dogen", keto pasautne I Lutung. Nyanan petengne, kema lantas sig lad I Siap Badenge medem ibi sanja. Dening I Siap Badeng suba tangeh teken dayanne I Lutung corah, sing kone ia bani medem ditu, dadi sing tepukina I Siap Badeng teken I Lutung. Ngincang kone lantas I Siap Badeng medem.
Kacrita suba jani pada kebah kampid pianakne sajawining abesik nu kolagan.
Sedek dina anu ba dauh tukad kone I Siap Badeng ngalih amah ajaka pianakne makejang. Suba sanja, laut gulem kone, lantas pianakne ngajakin memenne mulih,
15