Masaut pianak Men Tiwase, "Tusing, icang maan di alase,
sedekan icang ngalih saang ajak memen icange".
Dening uyut dingeha taken Men Tiwas uli di paon, lantas ia
nyagjag ka ampike, dapetanga Men Sugih makeya ajaka pianakne.
Ditu lantas nlatarang paundukanne maan mas-masan di alase, tutur-
anga uli ia nektek saang aji blakas kecong-kecongan. Men Sugih
iri pesan mara madingehang tutur Men Tiwase buka keto, prajani-
an ia mulih ngorta teken kurenanne.
"Bapanne, Bapanne suba nawang, Men Tiwas nemu bagia ibi
di alase, sedekan ia ngalih saang laut nepukin kidang putih, tur
kidange ento nunden Men Tiwas nyeluk jitne. Mara seluka jit
kidange ento, laut mamesu mas-masan uli tengah basang kidange.
Ane buin mani icang lakar kalase ajak i cening, singnya kaget ada
pasuecan Widi, nepukin kidang buka Men Tiwase ibi".
Masaut ne muani, "Memenne, yan dadi baan oke, da nyai
kalase, joh nyai bakal nepukin Widi buka keto. Buinne, ne gelah-
gelah i deweke ane ada jani, rasa tuara telah baan naar sakayang-
kayang. Bakal gena sih ento patuutin?", keto panglemek Pan Sugihe
teken kurenanne. Ane luh masih mrereng lakar luas kalase.
Kacrita buin mani semenganne, payu kone Men Sugih ajaka
pianakne ngaba blakas kecong-kecongan, kenehne apang patuh pesan
buka pajalan Men Tiwase. Suba kone teked di alase, lantas Men
Sugih nektek saang. Sabilang tektekanga blakasne, kecong. Buin
kejepne teka lantas kidange putih nunden Men Sugih nyeluk jitne.
"Seluk jit kune!" Mara acepok mamunyi kidange ento. Men
Sugih ngenggalang nrojog, sahasa nyeluk jit kidange. Mara pesan
macelep liman Men Sugihe di jitne, lantas kijemanga. Men Sugih
lantas palaibanga kebete. Men Sugih tulung-tulung, jerit-jerit, ka-
sakitan maered ludin antep-antepanga di punyan kayune. Pianakne
makwewengan, mabudi nulungin tuara bani. Ditu lantas ia mlaib
mulih, morahan teken bapanne.
"Dong dayanin, dong dayanin". Begbeg keto dogen munyin
Pan Sugihe sambilanga mlaib nyagjagin kurenanne.
Makelo alih-alihina Men Sugih di tengah alase, pamragat
tepukina kesul-kesul di tengah punyan ketkete, gruguh-gruguh
naanang sakit, awakne telah babak belur. Di subanne Men Sugih
ka sisianga teken kurenanne, lantas ajaka mulih. Di jalan Men
Sugih tuara pegat-pegat maselselan, nyelselang buat kalacuranne
buka keto.
-81-