Kasusastran Bali (Satua Bawak Mabasa Bali)/Pamahbah
PAMAHBAH
Buku alit puniki madaging papupulan satua bawak wantah tigang soroh, ulih-ulihan saking pasawamarane kawetenang olih kantor Balai Penelitian Bahasa Singaraja, duk warsa 1975. Dening katah indike sane ngapialangi wau rauh ring warsa 1997 puniki sida antuk nadosang buku, sakadi ring ajeng para pangwacen.
Pasewamaran satua bawak Baha Bali puniki, kawentenang ngawit saking tanggal 3 Pebruari 1975 jantos tanggal 20 Maret 1975 pinaka reruntuhan ngamargiang kaputusan-kaputusan sane kamedalang ring pasamuhan-pasamuhan Basa Bali minakadi Pasamuhan Agung Basa Bali tanggal 28 - 29 Oktober 1974.
Sakadi sane sampun langkung pasewamarane sane kawentenang punika boya seos wantah kanggen panuldul, turah baos kadi mangkine "perangsang" ida dane sareng sinami sane kantun mapakayunan ngrajegang basa druene. Napi sane ngranayang asapunika, boya ja lian doaning makueh gatra-gatrane sane kapiragi, miwah sane munggah ring surat kabar miwah majalahe, alit-alite mangkin katah sane kemad nganggen basa druennya minakadi ring ajeng sameton lianan napi malih ring ajeng para lingsir-lingsire. Saking pakayunan sakadi ring arep punika para sang uning kengin ngardiang Basa Bali druene.
Basa Bali druene puniki kantun mangge, kari karajegeng, nangingke taler katah pisan sane patutu wewehin miwah sane patut gentosin, mangda manut ring turah kamajuan jagate mangkin. Taler mangda ida dane sami tan kemad mabaos miwah masesuratan nganggen Basa Bali. Punika awinan mangda sareng sami mamaosin napi sane patut kaapti.
Seos ring punika taler kaicen plajahan Basa Bali. Mangkin sampun kawentenang buku-buku bacaan ketusan saking satua-satua, kawentenang buku-buku kamus, majalah-majalah wiadin surat kabar miwah sane lian-lianan.
Awi-awian satua bawak sane katrima ring i Panitia wenten ulu likur katah ipun. Nanging tetiga sane polih nomor adiah, manut ring uger-uger sane kanggen patokan. Sane polih nomor-nomor punika sakadi sane ring sor puniki.
[ ii ]No. 1. Satua bawak sane mwasta "Mategul Tan Patali" pakarian dane I Gusti Ngurah Waca Warsana, saking Peguyangan, Denpasar.
No. 2. Satua bawak sane mwasta "Togog" pakarian dane Nyoman Manda, Guru SMA Negeri saking Gianyar.
No. 3 Satua bawak sane mwasta "Matemu Ring Rumah Sakit" pakarian dane I Nyoman Tri Satya Paramartha, kantor Dokabu Tingkat II Buleleng.
Inggih asapunika awi-awian satua bawake sane sampun polih nomor adiah ring pasewamarane duk warsa 1975 sane kawentenang antuk Balai Penelitian Bahasa Singaraja.
Asapunika taler kirang-langkung atur titiang ring pamahbah puniki, ledang ngampuraang. Dumadak buku alit puniki wenten pikenoh ipun.
|
Singaraja, 2 Mei 1977 Panitia Sewamara
Drs. I Made Jendra |