Wikisource

Kembang Rampe Kasusastraan Bali Purwa Wewidangan I Buku II/Geguritan Japatuan

< Kembang Rampe Kasusastraan Bali Purwa Wewidangan I Buku II
[ 31 ]

1.11 GEGURITAN JAPATUAN

Puh Dangdang

  1. Ki Gagakturas sumaur aris, "Inggih Adi pidartayang ika, ne tiba kulon atmane, papa swargannyane iku," Ki Japatuan nyaurin aris, "Inggih titiang pidartayang, mangden Beli tatas kuruh, piarsan Beli apang melah, tutur iki, swargane kulone lewih, pakolih putusing yadnya.
  2. Saatmane nene sasar sami, tiba kulon atmaning alpaka, ring guru muang ibune, anglayaning guru wadu, muang tamiu, angkara ring laki, kalih jadmane cilaka, tan paanak muang putu, ginantung ring petung ika, sigit wenang, tiba sami pajungkilang, len labuh nepen parangan.
  3. Malih nene rasa tua mati, atmannyane ginantung ring rangdu ika, miwah jejaka tuane, naler ia ginantung iku, kapanesan sai paengkik, seos atmane kasasar, sami ia pada binuru, dening Sang Cingkarabala, sami ngepung, len ada ng aba gegitik, belakas kalawan berang.
  4. Atmane ditu pada pajerit, mabiayuhan sedih mangatonang, Cingkarane aeng-aeng, ngaba blakas berang iku, len gegitik golok padingkrik, ada nigtig ada nyempal, sedih ia pada paulun, sami pada mabiayuhan, pabelesat, malaib kabirit-birit, ana tiba pajuringkrang.
  5. Amanincap titi gongg ang mangkin, raris tiba ring pangkung jro pisan, makeh tiba atmane, mapenpen ring pangkung iku, kocap malih lor punika, meru tumpang solas iku, apucak widure kresna, lawang ane wesi malela inukir, rerangga kumuda kresna.
  6. Asosocan kresnadana bangsir, raabnyane genting keris pedang, ider-ider sutra ulunge, pepedeke kasur ulung, sesapute ratna bangsing, akatik besi malela, juru sapuhe punika, Widadari Nilawati, anengkana, swargane ratu sukerti, lewih brata putusing yasa.
  7. Yaning sasar yasane nguni, linebok ring kawahing [ 32 ]
    1. blegada, endut ngilehin merune, ingan salahe ring dangu, nibeng kawah malih kaangkid, ana malih lor punika, taru agung aluhur, wohyane keris pedang, sasenjata, atmane pada paengkik, mayuban anengkana.
  1. Saure Ki Gagakturas aris,"Inggih gaok beli miragiang, Sang Ratu nibeng kawahe, apang ida lewihing ratu, pinupulan boga bukti sami, dadi ida manggih papa, ki Japatuan sumaur, "Donong ida manggih papa, ratu rusit, lampahe merih pakoli, karaning amanggih papa.
  2. Yan sang ratu wikan raos sami, sai-sai mamupulang brana, anggo mayu kayangane, sami pada becik sampun, sane sedeng sungsung baktinin, kayangan pangulun jagat, sami pada kapaayu, saha widi widanane, negteg sampun, walining kayangan sami, karaning ebuh negara.
  3. Sami gatane pada mamuji, dening ida putusing sukerti, sami murah tutukone, tekeng sunantara kasub, sami teka saatur bakti, karaning amanggih swargan, ucap jagate rahayu, yan ala ucaping jana, iku kawah, karaning eweh mamukti, sugih demit anggon sasar."
  4. Durus Adi pidartaang malih saatmane sasar ngalor ika, paran reko, salitayane," Ki Japatuan sumaur, "Salit ipun ikang nguni, duke ring madiapada, lintang jayuhe mamuput, kalih jadmane ngeleak, amigedeg, manyetik maneluh nesti, kalintang sasare ika.
  5. Malih atma rabining arabi, audanggris sasare kalintang atma luh lintang jaruhe, marosih tekening kakung sami sedih pada paengkik, ngaub ring kayu curiga rauh paksi geng aluhur, tur amuka detia kala, tumramping taru, mangogar nangupag-apig, keris pedang nibeng atma.
  6. Sami pada nahen nandang kanin, pada ngengkak masih twara pejah, raris rauh Cingkaraning, ngaba blakas berang iku, len gegitik raris manigting, atmane pada paengkak, malaib pada mangidul, rauh ring watu macepak, sengguh embon, dening panese tan sipi, watu nyebak dadi makpak.
  7. Sampun dekdek kawangsulang malih, tiba ring madiapada
[ 33 ]
  1. ika, dadi endep namu-namune, dadi uler cacing iku, len kurimis malih numitis, ne luh dadi Cicing lua, ne muani mandadi Kaung, apan kawit jaruh sama, nene nguni, sangkan anake neptepin, sane tan tutur ring sastra.
  1. Kalih atmane ne luh nesti, rauh kidul kapagpag ban genia, dening bala Cingkarane, kaborbor sami paulun, empuk angit dewek kaya guling, masih ia tong ada pejah, binakta ring tambra iku, kinela ia sing temuang, kengin entip, kakeduk katektek malih, tiba maring madiapada.
  2. Dadi lintang Jelati lan Cacing, Ulad-alid saluiring lumampah, tan nuut awane, mandadi Baduda iku, sai-sai mangunyek bacin, Ki Gagakturas mangucap, "Ne iring madia lintang luung, durus Adi pidartaang, mangde Beli, apang tatas uninga sami,"Masaur Ki Japatuan.
  3. "Ne ring madia pamuputing lewih, manca warna panganggene ika, meru solas ia tumpange, lawangan merune nyatur, tur apucak nawa ratna manik, lawang ane marep purwa, selakane kembang menuh, ukiran seroja mata, sasocane, erlembu lawan ergeni, kalih lawan mutiara.
  4. Punika ne marep kidul mangkin, lawangane tembagawasa ika, patra geni ukirane, rerangga ratnadi murub, bang netra kembang ratnadi, lawangane marep kuluan, mas cinitreng rempuh, sesocan ratna campaka, jagasatru, kalih lawan ratna sasih, lawangane lor ika.
  5. Wesi malela lan purasani, ukirane aun-aun ngumabang, sesocan kresna danane, ratna kastuba puniku, nila pangkaja kalawan bangsing, ider-ider gringsing wayang, luluhur sutra unahun, tinrapi kanakadrawa, sami sutra, sinulam gringsing ringgit, ulon-ulon premas rakta.
  6. Cecandena grantangan silih asih, kasur sari lambene sinulam, tingkah patra gumulune, pedeke tumpuk pitu, sinulam kencana mas manik, sesapuh komala jingga, akatik mas sinang murub, juru sapuh nrepadwita, anengkana, swarganing wiku sukerti, tur putusing catur weda.
[ 34 ]
  1. Yan sasar silane ne nguni, linebok ring kawahing blegada, endut ngelehin merune, ingan salahe ring dangu, nibeng kawah malih kaangkid, tulak ring madiapada, dadi ratu tuara mangkuh, dadi manggih suka duka, maring pada, yan putus silane nguni, tan hana malih manjadma.

Puh Smarandana

  1. Ki Japatuan lingnia aris, "Mriki dumun laku simpang, kidul purin I Bapa, lawange marep utara, kirune maupapira ukirane abra murub, apucuk ratna bang netra.
  2. Bale tiang sanga adi, bale padma singarata, sarwa meru panganggone, leluhur samire rakta, merune sarwa abang, "Gagakturas dengeng dulu, abra sinang lewih suwarna.
  3. Ki Japatuan mangraris, kacunduk prenah i bapa, "Iki atma paran reko, rumojog tan pararapan," Saure Ki Japatuan, "Titiang okan Bapa tuhu, sampun Bapa katandruhan."
  4. Ramane sumaur aris, "Anambat naman bapa ika, yan cai tatas wruha, tuhu cai anak inguang, "Ki Japatuan angucap, "Inggih titiang ngiring Guru, nambat manah Bapa ika.
  5. Angkara wijiling geni, iku tuhu naman Bapa, "Ramane aris ujare, "Tuhu cai anak bapa," Meme aris ngandika, "Tuhu cai anakibu, dini ko cai magenah."
  6. Ki Japatuan lingnia aris, "Titiang nawegang mamindah, títiang malih simpang baler, mamarek dane i pekak, "Ramane aris angucap, "Bukan bapane asunum ategen Bapa wah mreta."
  7. "Meme suka teken cai, ategen asuun ika, "Ki Japatuan nabda alon, "Inggih titiang mangiringang, "Tumuli raris manyembah, "Titiang wantah neda Sang Guru, kalih Biang titiang nunas.
  8. Kalih titiang nunas pamit, "Ki Gagakturas anyumbah, ring utara pangojoge, tan kocapan ia lumampah, sarauhe iríka, Ki Gagakturas andulu, cengeng gaok mangantenang. [ 35 ]
    1. Lalean lawange sami, balane sami suwarna, Ki Japatuan lingnia alon, "Nunas beli umanjinga, "Kacunduk sane i pekak, "Atma paran nika rauh, rujog tan pararapan."
    2. Ki Japatuan lingnia aris, "Titiang sampun putun Pekak," I Pekak aris ujare, "Anambat namaning pekak, yan Cai tatas weruha, suka pekak ngaku putu, reh cai weruh ring pekak."
    3. Ki Japatuan lingnia aris, "Tabe titiang mangaturang, ongkara, wetuing gegana, iku tuhu naman Pekak," I Pekak raris angucap, "Tuhu naman pekak iku, tui cai putun pekak."
Kapolihang saking "https://ban.wikisource.org/w/index.php?title=Kembang_Rampe_Kasusastraan_Bali_Purwa_Wewidangan_I_Buku_II/Geguritan_Japatuan&oldid=108440"