Kembang Rampe Kasusastraan Bali Purwa Wewidangan I Buku II/Geguritan Lutung Mungil

by I Gusti Ngurah Bagus miwah I Ketut Ginarsa

[ 14 ]

1.6 GEGURITAN LUTUNG MUNGIL

Puh Durma

1. Awake kolug beksa katunan sastra, sing bikas ngawe cengil, ibuk sakit merang, gumine kali nitah, wetu idep twara imbih, , genep ririgan, sat mawak sastra mati.
2. Dwija werda gangga malih ngaksamaang, ring ida Ratu Gusti, sing sudi manyingak, sastrane mabrasutan, tani pasang pupuh dangding, mwah pasang rebah, sok dadi ia pacain.
3. Pacang anggon satua di kalaning jumah, nuturin cenik-cenik, , pilih sida sadia, gangan ajak malajah, reh suba nyandang murukin, ngugianin sastra, langa wekasing Tantri.
4. Ada bojog mungil cecep makeruna, mula ngupaya sandi, tustusning Kiskinda, ia mula karepang, mantuin Sang Rama nguni, ngalahang desa, Lengkane lingsem bersih.
5. Ento pisan kingetang ban wenara, lut makekasihan jani, ring dane kakua, tresna ambul manyama, makilit saling sukanin, I Lutung ngakak, mamunyi kenying-kenying.
6. "Duh Kakua jalan ja barengan luas, cekuh jaene nadi", munyin Sang Kakua, "Dija ada punyannya", I Lutung banggras mamunyi, "Data takonang, jalan jemak ne jani."
7. Sang Kakua masih sesed manakonang, I Lutung manyautin, "DukuhKanteruan, galah kalilirannya, kumpinya ia namiang jani, " laut majalan, marerod sareng kalih.
8. Ceritaang suba neked jroning abian, aget manuju sepi, I Lutung ngenggalang, ngengkeh ngesop nglepehang, aruh lalah san ja kai, I Kakua nyaprak, dadi makerah mama-ling.
9. Saget teka De Dukuh manganggar tumbak, mandup - andup nimpugin, Sang Lutung ia mabuang, menek di kayu enggal, Sang Kakua celang nyelihsih, batan tengkulak, De Dukuh manyelaksakin.

[ 15 ]

10. Lut makejit I Lutung dadi ngendingang, I Kakua batan tengkulak , I Lutung ia mabuang, menek di kayu ragas, "De Dukuh emeng manampi, ban munyi tawah, agol mabreca-breci.
11. Dadi negak De Dukuh nginger ngresepang, munyine I Wreakik, lut ngungkab tengkulak, sang Kakua mulesang, kajemak lut kakisain, Jro Dukuh enggal, nadtad mangaba mulih.
12. Teked jumah Jro Dukuh manyritin panak, "Anom mai te gelis, Bapa ne mabahan, pacang be jaan pisan, nglaut ngae basa nyai, santene liunang, panga nyolo bebekin."
13. Ni Ayu Kantrungan matur sandikan, nesek gurune gelis, laut mamasang, "Pak punapi punika," Gurune alus nyaurin, "nah ne pedasang, kakua kocap kadanin.
14. Timbung bangkit lawar komohnyane melah, timpalang arak manis, nasi baas barak, " Lut karangkengin enggal, De Dukuh raris nakonin, "Apa amah ba," sang Kakua nyaurin,
15. "Inggih Jro kulit bantal tedan titiang, tekaning biu kuning, yan sida akehang, mangden titiang segeran, wantah keto sai-sai, ne tedan titiang, "I Dukuh Kantrungan gelis.
16. Lwas ngalih biu krayaning kulit bantal, polih akisa nyedit, lut mulih ngenggalang, lantas dane nyerahang, panake ngabaang gelis, I Kakua ngakak, legane tidong gigis.
17. Mrasa sida banya nglengkara upaya, mikena i wenari, ban mula kastawa, patining roang ne jani, "iba tandingin kai, masang upaya, silib daat sandi."
18. Tan cerita I Kakua De Dukuh kocap, nunden pianake ngulig, basa suba pragat, Ni Ayu lantas negak, di natahe marep kangin, reh tangkep bajang, bibikasane raspati.
19. Caritaang I Lutung teka ngabaang, kenehnyane nyenukin, bebandan kapriksa, enu ia maseeban, ngenah daa bajang cenik, nglaut mulihan, masih ngingse sangid.

[ 16 ]

20. Teked ditu di jumah dane Kantrungan, lantas suba kapanggih, teken sang Kakua, I Lutung makejit ngincang, manjaka kedek manggikgik, "kadenang bangka, krana kai nelokin."
21. Sang Kakua mendep gedege kalintang, inget teken kadadin, reh pada prawira, ne I Bedawangnala, sida ko nasarin gumi, reh kadarmakang, yen sidanen nto iring.
22. I Kakua alus munyinnyane banban, "O Bojog bu teka mai, takeh bane iwang, eda iba bas ampah, ngaden kai kasakitan, ne jani delikang, buat amah kai dini.
23. Bantal biu nyabran kai alihanga, kalih kai nene jani, pacang kawinanga, ring dane Ni Luh Kantrungan, to iwasin uli dini, ia ngulig odak, lemburud serbuk minging.
24. Kai sayang kacirenan ban I Bapa, sagelah dane sami, suba kasukserah, carike miwah abian, kalih tongose mamaling, kai ngelahang," I Lutung manyaurin.
25. "Duh Kakua legane jani tutugang, kumanyama teken kai, ingetang da ngengsap, dini-ditu bareng duang, gelah iba gelah kai, twah keto pisan, tresnane ulih riin.
26. Biak-biuk bareng nama jele melah, sapahelane sami, sampun kapratingkah, lumaksana jak dadua," I Kakua alus nyautin, "Bah ento saja, inget kai ne riin.
27. Saduk kaine nepukin duhkita, iba nglintangang kai, nah suba depang, kai buung manikah, jani iba dadi wakil, ngentosin ira, nah pesuang kai jani."
28. I Lutung encong krangkenge kabungkahang, I Kakua pe-su gelis, I Bojog muliha, I Kakua ngancing enggal, sambilang matbat munyi, "Bojog bebedag, bangka iba ne jani,"
29. Lut magedi I Kakua I Bojog kocap, jejeh idepe mimir, gedeg sakit merang, bane kena upaya, kenehe mangwales buin, De Dukuh kocap, Ni Luh Kantrungan kajritin.